Ecoloxistes n’Aición d’Asturies pide al Principáu que confirme si HUNOSA presentó en plazu la documentación esixida y cuándo va poder consultala la ciudadanía, poniéndose’n dubia si el retrasu ye un casu d’ineficiencia, desenfotu o d’intereses particulares
Ecoloxistes n’Aición d’Asturies presentó una solicitú formal d’información ambiental al Gobiernu del Principáu pa conocer en qué situación s’atopa’l nuevu estudiu d’impactu ambiental del proyectu de tresformación de la central térmica de La Pereda, en Mieres, cuando pasaron yá cuatro meses dende’l vencimientu del plazu marcáu pola propia Alministración.
La resolución del 27 de marzu de 2026, pola que la Conseyería de Ciencia, Industria y Empléu concedió a HUNOSA l’autorización alministrativa previa y l’autorización de construcción, estableció que la empresa tenía que presentar nun plazu máximu de dos meses un nuevu estudiu d’impactu ambiental acordies cola Llei 21/2013 d’Evaluación Ambiental y cola sentencia 83/2026 del Tribunal Superior de Xusticia d’Asturies.
La sentencia llegó tres una llarga contestación social y xudicial al proyectu y anuló la tramitación ambiental que permitía la quema de residuos y biomasa na térmica de La Pereda, al apreciar deficiencies relevantes nel procedimientu.
A finales de mayu cumplióse’l plazu establecíu pola propia Alministración. Agora, a puntu d’entamar ochobre, Ecoloxistes n’Aición afirma que nun tien constancia de que’l nuevu estudiu fuera sometíu a información pública.
Por esti motivu, solicita al Principáu que detalle si HUNOSA presentó la documentación dientro del plazu, qué trámites se realizaron dende entós y cuándo va abrir l’Alministración el periodu nel que la ciudadanía pueda consultar el nuevu estudiu y formular alegaciones.
La tramitación de La Pereda vien acompañada d’una movilización ciudadana continuada. Yá en xineru celebrárase una concentración frente a la sede de HUNOSA contra la quema de residuos na central y, tres la nueva autorización concedida en marzu, distintos colectivos volvieron llevar la protesta a Uviéu y anunciaron nuevos recursos contra’l proyectu. En mayu, la movilización llegó nuevamente a la Xunta Xeneral.
Una de les cuestiones sobre les que la organización reclama especial claridá ye’l destín de les cenices, escories y demás residuos xeneraos pola instalación. La sentencia del TSXA señaló la falta de concreción sobre la xestión d’estos residuos, un aspectu especialmente relevante pola cantidá prevista y polos sos posibles efectos ambientales.
La oposición al proyectu siguió visible nos meses siguientes. En xunu, colectivos contrarios a la incineración convocaron una concentración en Mieres coincidiendo col conciertu de Víctor Manuel y, en xunetu, la protesta volvió a la Xunta Xeneral durante l’alderique políticu sobre La Pereda.
Ecoloxistes n’Aición pide igualmente conocer si’l retrasu na tramitación ambiental puede tener efectos sobre’l calendariu d’execución y puesta en serviciu de la central.
La organización recuerda que la participación pública tien que producise nun momentu nel que inda seyan posibles l’exame d’alternatives y les modificaciones del proyectu, y non cuando les obres o los compromisos económicos y alministrativos puedan condicionar de fechu les decisiones posteriores.
Por ello, reclama al Principáu que facilite la documentación solicitada y aclare públicamente si HUNOSA cumplió’l plazu, en qué fase ta agora’l procedimientu y cuándo va abrise a información pública’l nuevu estudiu ambiental de La Pereda.
This work is licensed under a Creative Commons Attribution 4.0 International License.
