El XVI Salón Internacional de les Sidres de Gala presentó una edición histórica, con 311 productos procedentes de 117 llagares de 35 países. El sábadu 26 de setiembre va llegar el momentu de mayor contactu cola ciudadanía: por 10 euros, el públicu va poder entrar na Tastia Abierta nel Recintu Ferial Luis Adaro y descubrir sidres de tol mundu de la man de los sos propios productores

Un momentu de la intervención del presidente de la Fundación Asturies XXI

El SISGA’26 presentóse esti llunes nel Salón de Receiciones de la Casa Conceyu de Xixón, onde la Fundación Asturies XXI dio a conocer les cifres definitives d’una edición que va celebrase del 24 al 27 de setiembre.

Son 311 productos, 117 llagares y 35 países, unes cifres que convierten esta decimosexta edición na de mayor de la historia de los Salones de sidre a nivel mundial y que confirmen el fuerte crecimientu internacional que yá se venía apuntando cuando, a primeros de mes, el SISGA’26 superaba los cien llagares inscritos.

Durante cuatro díes, Xixón va ser puntu d’alcuentru de productores, profesionales, instituciones y cultures sidreres llegáes d’Europa, América y Asia. Una diversidá qu’espeya hasta qué puntu la sidre ye güei un productu global, con ellaboraciones, variedaes de mazana y formes de consumu mui estremaes según cada territoriu.

Pero, más allá del programa profesional y de les cifres de récord, el sábadu va ser el día nel que tol esi mundu sidreru quede directamente al algame de la ciudadanía.

El sábadu 26 de setiembre, el Salón Asturias del Palaciu de Congresos del Recintu Ferial Luis Adaro de Xixón va acoyer la gran Tastia Abierta al Públicu, de 12:00 a 15:00 hores y de 17:00 a 20:00 hores

La entrada cuesta 10 euros y permite facer daqué poco habitual: percorrer nun mesmu espaciu una parte importante del mapa sidreru mundial, tastiar productos de decenes de procedencies y falar directamente coles persones que los ellaboren.

Sidres d’espolleta o de copa, brut, semiseques, dolces, de xelu, de fuéu, de pera, aromatizaes, innovadores o ellaboraes con métodos tradicionales van convivir nel mesmu salón. 

Na presentación, Carme Pérez, vicepresidenta de la Fundación Asturies XXI, destacó precisamente la pluralidá d’esta edición y el papel que’l SISGA quier desempeñar como espaciu d’intercambiu internacional.

La filosofía del Salón, esplicó, nunca foi simplemente colocar productos sobre una mesa. El so ADN ye xunir productores “dende la mazana a la botella”, incorporando gastronomía, turismu, cultura gastronómica, intercambiu profesional y cooperación internacional.

Esa apertura hacia fuera vien desenvolviéndose durante tol añu. LA SIDRA siguió sobre’l terrén la evolución del sector internacional, como na Cider World 2026 de Frankfurt, o na CiderCon 2026 de Providence, onde se trabayó precisamente na promoción de la cultura sidrera asturiana, na creación de contactos internacionales y na captación de productores interesaos nel SISGA.

Antonio Migoya, de la Fundación Caja Rural, centró parte de la so intervención nel valor que tienen estos alcuentros pa los propios productores asturianos.

Conocer cómo trabayen otros llagares, qué productos faen y cómo afronten los mercaos permite volver a casa con idegues nueves. Migoya resumiólo recordando que de salir de casa siempres s’aprende daqué, y que munches de les coses vistes n’otros territorios pueden adaptase dempués a la realidá de cada productor.

Esi intercambiu ye ún de los elementos que convierten el SISGA en daqué más qu’una tastia. Los contactos ente productores y territorios fueron dando llugar a iniciatives de cooperación estables, como Cider Cities, la rede europea de territorios sidreros que sigue ampliando actividaes al traviés del proyeutu CIDEREU y de propuestes como’l primer concursu internacional de semeyes CIDEREU.

Per parte de la Cámara de Comerciu de Xixón, Álvaro Alonso destacó precisamente lo que significa económicamente tener durante unos díes na ciudá representantes de 35 países, y puso en valor que parte del SISGA se desarrolle nel marcu d’AGROPEC.

Alonso apuntó tamién a una ambición más amplia: utilizar esta rede de productores, ciudaes y territorios pa reforzar la posición de Xixón como referencia internacional nel mundu de la sidre.

La gastronomía va ser otra de les pates del programa. Pedro Baldó, de Finca El Duque, esplicó que la propuesta gastronómica del SISGA parte de los productos asturianos, pero buscando formes nueves d’acompañalos coles sidres participantes.

La so intervención dexó una frase que resume bien’l cambiu que se percibe nel sector: “la sidre va evolucionando, tien mercaos nuevos, tien formes nueves de bebese”.

El Brunch de Gala del domingu va llevar esa idega a la mesa con una propuesta basada en productos asturianos y platos concebíos pa dialogar coles diferentes sidres.

El presidente de la Fundación Asturies XXI, Marcos Abel Fernández, destacó na presentación que reunir tantos productores significa facer convivir formes mui diferentes de cultivar la mazana, producir sidre, comercializala y entender empresarialmente’l sector.

Esa diversidá, señaló, convierte’l Salón nun espaciu especialmente útil pal intercambiu de conocimientos y esperiencies.

Pero’l sábadu esa riqueza dexa de quedar nel círculu profesional. Nel Recintu Ferial Luis Adaro, cualquier persona va poder acercase a productores llegaos d’Europa, América y Asia, preguntar, comparar y tastiar productos que difícilmente se pueden atopar habitualmente n’Asturies.

Amás de la tastia xeneral, el programa inclúi tasties guiaes, espacios dedicaos a conocer con más detalle determinados productos y la posibilidá de mercar sidres participantes cuando tean disponibles.

Por eso, les grandes cifres de la presentación —311 productos, 117 llagares y 35 países— tienen el sábadu una traducción bien sencilla: durante seis hores, una parte importante del mundu sidreru va poder percorrerse ensin salir de Xixón.