Families de Biedes, Paraes, Premió y Agüera tienen que llevar ca díi pola so cuenta a los neños y neñes hasta’l CP Príncipe d’Asturies, en Santuyanu, mentanto Educación, el CTA y la empresa responsable, valenciana, van treslladándose a responsabilidá ensin dar una solución.

Los díes pasen, el cursu avanza y quince neños y neñes de Les Regueres siguen ensin poder facer usu del tresporte escolar pa llegar al CP Príncipe d’Asturies, en Santuyanu.

Los escolinos afeutaos viven nos pueblos de Biedes, Paraes, Premió y Agüera, a km del colexu, polo que son les families les que tienen que s’organizar diariamente pa llevar los sos fíos y fíes al colexu. Cuando nun pueden facelo, tienen que recurrir a familiares, vecinos o cualquier otra solución improvisada que-yos permita garantizar que los menores lleguen -y vuelvan- a clase, una situación que, cola marcha del cursu, ta convirtiéndose nun problema cada vez más difícil de sostener.

L’equipu directivu del CP Príncipe d’Asturies lleva dende l’entamu de cursu reclamando una solución ensin que, hasta agora, ninguna de les partes implicaes asumiera la responsabilidá de garantizar el serviciu.

La respuesta conviértese nun círculu: la Conseyería d’Educación deriva’l problema al Consorciu de Tresportes d’Asturies (CTA), esti treslládalu a la empresa responsable del serviciu y les families siguen ensin autobús.

Col avezau surrealismu que caracteriza les decisiones d’esta alministración, la empresa de tresporte contratada pol Principáu, lloñe de ser asturiana, tien sede en Valencia, tampoco ye quien a dar una solución y la persona que los atiende nin siquiera conoz la situación xeográfica de Les Regueres.

El resultáu ye que quince escolinos lleven yá dellos díes de cursu ensin disponer d’un serviciu esencial pa garantizar el so accesu normal a la educación.

Nun ye, amás, un problema desconocíu n’Asturies. Hai años que les deficiencies nel tresporte escolar provoquen conflictos similares.

La situación de Les Regueres vuelve poner enriba la mesa una contradicción cada vez más evidente. L’Alministración asturiana reafirma de contino’l so compromisu cola fixación de población nel mediu rural, pero la realidá cotidiana de munchos pueblos sigue marcada pola perda o precarización de servicios básicos.

El tresporte escolar nun puede depender de que cada familia tenga coche, disponibilidá horaria o vecinos que puedan echar una man. La falta de tresporte condiciona directamente la vida familiar, la conciliación y la propia posibilidá de vivir nos pueblos, precisamente nel momentu nel que Asturies afronta un grave problema demográficu y una perda constante de población nes zones rurales.

Nun territoriu onde la despoblación avanza hasta dexar cientos de pueblos ensin habitantes, garantizar servicios como la escuela, el tresporte, la sanidá o les comunicaciones nun ye una cuestión secundaria: ye una condición imprescindible pa que les families puedan siguir viviendo nel territoriu.

La paradoxa ye especialmente evidente cuando se compara esta falta de cobertura cotidiana con otres prioridaes del Gobiernu asturianu. Esti mesmu branu, el Principáu anunciaba refuerzos del tresporte públicu nel Oriente orientaos específicamente a facilitar los desplazamientos turísticos, mentanto que families que viven tol añu nel mediu rural siguen atopándose con dificultaes pa disponer d’un tresporte básicu pa llevar a los sos fíos al colexu.

This work is licensed under a Creative Commons Attribution 4.0 International License.