De los 513 expedientes resueltos na resolución de la cabera tanda, 205 fueron denegaos y 43 acabaron por desistimientu. La denegación d’ayuda llega nun momentu nel que l’accesu a una vivienda ye una de les principales torgues pa la emancipación de la mocedá asturiana

El BOPA espubliza esti martes una nueva resolución del BonuAlquiler Xoven 2026 que vuelve poner de manifiestu tanto la demanda d’estes ayudes como la cantidá de solicitúes que nun acaben recibiéndoles. De los 513 expedientes tramitaos nesta tercera tanda, 265 tuvieron resolución favorable, 205 fueron denegaos por incumplir dalgún de los requisitos y 43 quedaron como desistíos, ello ye, que 248 de les 513 persones incluyíes nesta resolución nun reciben l’ayuda. Esto significa que namás el 51,7% de los expedientes resueltos nesta ocasión acaben nuna concesión.

La resolución, fechada’l 4 de setiembre, concede un total de 994.211 euros. El programa permite recibir hasta 250 euros mensuales durante un máximu de 24 meses, cola finalidá declarada de facilitar l’accesu o’l caltenimientu d’una vivienda o habitación n’arriendu a persones mozes con recursos económicos llendaos.

La importancia de la ayuda entiéndese meyor al mirar la situación de la mocedá. N’Asturies, namás el 11,9% de la población d’ente 16 y 29 años consigue emancipase, inclusive nun escenariu nel que meyoraron dellos indicadores d’emplegu. Los alquileres, les fiances y la distancia ente salarios y precios de la vivienda siguen convirtiendo la salida del llar familiar nuna operación difícil pa una parte importante de les xeneraciones mozes.

La presión del mercáu tampoco se llenda a la mocedá. La medría del ensinllarismu en Xixón o les reclamaciones vecinales pa recuperar vivienda residencial frente al crecimientu del usu turísticu dibuxen un problema estructural que va bastante más allá d’una ayuda concreta.

De fechu, esti añu los colectivos pola vivienda volvieron sacar el problema a la cai nuna movilización en Xixón pol drechu a una vivienda digna y asequible. La cuestión de fondu sigue siendo la mesma: una ayuda de 250 euros pue aliviar la factura mensual de centenares de persones, pero nun modifica por sigo sola un mercáu nel que los precios siguen alloñándose de los salarios, pero la denegación d’incluso esa ayuda fae imposible en munchos casos intentar siquiera facer una vida normal.

This work is licensed under a Creative Commons Attribution 4.0 International License.