L’esbarrumbu d’otru horru nel conceyu d’Ayer vuelve poner enriba la mesa la necesidá d’una protección real pal padremuñu asturianu

Vien d’esbarrumbar un horru en Coḷḷanzo, , nel conceyu d’Ayer. Según la información que llega a esta redacción, la construcción nun aguantó más y acabó embaxo, sumándose a una llista de pérdides que se repite con demasiada frecuencia per toa Asturies.

Cada horru que cai ye una perda material, pero tamién muncho más. Desapaez una pieza del paisaxe, una forma de construcción tresmitida durante sieglos, un espaciu venceyáu a la economía campesina y, munches vegaes, una parte de la memoria familiar.

La paradoxa ye que nunca tuvieron tanta reconocencia institucional como agora. Dende abril d’esti añu, los horros del norte peninsular tán declaraos oficialmente Manifestación Representativa del Padremuñu Cultural Inmaterial, reconociendo’l Estáu’l so papel como vehículos d’identidá, memoria colectiva y pertenencia. El mesmu Real Decretu alvierte, sicasí, de les amenaces que suponen l’abandonu, la perda d’oficios tradicionales y la desconexón de les construcciones coles funciones que tuvieron históricamente.

Reconocer el valor d’un horru nun ye, evidentemente, lo mesmo que caltenelu en pie. Hai casos -como esti- que demuestren hasta qué puntu la protección sobre’l papel puede convivir cola degradación real.

Otru, de los más reciente, ye’l de la panera de Samartín de L’Aspra, en Castrillón, una construcción datada ente los sieglos XVIII y XIX y catalogada con protección integral. Yá nel 2008 constaba oficialmente la necesidá de facer actuaciones de conservación. En 2021 autorizóse’l so desmontaxe pa restaurala, pero la intervención nun llegó a materializase. Tres más de dos años de reclamaciones de Horru Online, el Conceyu acabó iniciando en 2026 el procedimientu pa declarala en ruina.

Castrillón anicia’l procesu de declaración de ruina d’una panera protexida

Entá más claru foi’l casu del Horru de Vis, n’Amieva. La construcción destacaba pola so antigüedá y poles pintures del estilu conocíu como La Francesá. Taba incluyida nel Inventariu del Patrimoniu Cultural d’Asturies y la propia Alministración reconociera en 2018 que’l so estáu de conservación yera deficiente y que precisaba midíes urxentes. Dos años dempués, l’horru esbarrumbóse. Andecha Astur reclamó entós responsabilidaes polítiques y alministratives y la reconstrucción de la pieza utilizando los materiales recuperables.

Andecha Astur pide responsabilidaes pol esbarrumbu del Horru de Vis

Son casos distintos, pero amuesen el mesmu problema: una figura de protección nun sostién una cubierta, nun cambia una viga podrida y nun paga un carpinteru.

La situación económica de los propietarios lleva años formando parte del problema. En 2021, cuando’l Principáu destinó 150.000 euros a una convocatoria a la que se presentaron 558 solicitúes  y que se resolvio con 268 euros por costrucción, InfoAsturies recoyía’l casu d’un propietariu que cifraba la rehabilitación d’un horru en Blimea en cerca de 20.000 euros, dempués de catorce meses de permisos, proyectu, tases y trámites.

El ridículu presupuestu pa sovenciones pa rehabilitar horros: 268 € por petición

Nos caberos años medraron les partíes y modificáronse dalgunes condiciones. La convocatoria actual permite’l pagu anticipáu de la sovención, pero les ayudes tienen un importe que nu cubre nin de lloñe la totalidá de la intervención y obliguen al propietariu a asumir una parte del gastu, presentar documentación, buscar profesionales y cumplir una serie de requisitos técnicos y alministrativos que nun siempres pueden xestionar.

Pa una familia con recursos puede resultar posible. Pa una persona mayor con una pensión pequeña, pa una herencia repartida ente dellos propietarios o pa quien tien un horru pero nun dispón de miles d’euros pa intervenir sobre él, la situación ye mui distinta.

La maera nun espera a que’l propietariu pueda aforrar. Tampoco espera pola convocatoria del añu siguiente.

Un propietariu pue querer conservar l’horru y, simplemente, nun tener los miles d’euros precisos pa entamar les obres. Si la única respuesta ye dicir que puede solicitar una sovención, pero pa llegar a ella necesita recursos, presupuestos, documentación y capacidá pa asumir la parte que nun cubre l’Alministración, la protección acaba dependiendo de la renta y capacidá del propietariu.

Ya en muncos casos el resultáu ye exactamente’l que güei vemos en Coḷḷanzo:

Un horru más embaxo.

L’actividá d’Horru Online, que lleva años documentando construcciones deterioraes y reclamando actuaciones a los conceyos, amuesa que nun falamos de casos aisllaos. En 2025 la plataforma yá llevaba centenares d’actuaciones y denuncies sobre horros, paneres y cabazos y advertía de la falta de respuesta de les alministraciones.

This work is licensed under a Creative Commons Attribution 4.0 International License.