El maíz forraxeru, pieza fundamental na alimentación del ganáu de lleche, pierde ente’l 60% y el 80% de la so producción  na zona central d’Asturies. La seca y les altes temperatures ponen agora cifres a un problema que la ciencia llevaba años anunciando: el clima ta cambiando y el campu asturianu nun puede siguir furrulando como si les condiciones del sieglu pasáu fueren volver

La seca entama a tener consecuencies graves nel sector agrariu asturianu. ASAJA Asturies cifra ente’l 60% y el 80% les pérdides nel maíz forraxeru na zona central del país, un cultivu fundamental nes raciones de munches ganaderíes de lleche. Al mesmu tiempu, la falta de pación obliga a recurrir antes de tiempu a les reserves d’iviernu o a mercar forraxes, paxa y concentraos nun mercáu onde los precios tán xubiendo. COAG alerta yá de ganaderíes de la cornisa cantábrica que valoren reducir la cabaña o alantrar el desvieye d’animales pa poder facer frente a la situación. Ye un casu más de los munchos daños que ta careciendo’l campu asturianu por mor, non solo del cambeu climáticu, sinón de nun poner en marcha midíes preventives con tiempu.

Les ayudes d’urxencia que reclamen les organizaciones agraries son necesaries pa evitar que les consecuencies inmediates acaben llevando al zarru d’esplotaciones. Pero llendar la respuesta a compensar económicamente los daños sería volver cometer el mesmu error. La seca d’esti branu nun ye un fenómenu que naide pudiera prever. Les proyeiciones climátiques lleven años indicando aumentos de temperatura, alteraciones nel réxime de precipitaciones y un mayor riesgu de periodos secos.

 En Picos d’Europa la falta d’agua yá llegó a poner en peligru’l ganáu na mayada d’Amuesa, y los incendios del añu pasáu obligaron a poner en marcha iniciatives como la distribución solidaria de forraxes ente les ganaderíes que quedaren ensin pación. Son episodios distintos, pero tienen un denominador común: un sector primariu cada vez más espuestu a fenómenos ambientales extremos y una planificación que sigue funcionando demasiáu frecuentemente cuando’l dañu yá ta fechu.

Adaptar el campu al nuevu clima nun consiste simplemente en instalar regadíos perdayuri. L’agua va ser precisamente ún de los recursos que más cuidadosamente habrá que xestionar. La situación obliga a conocer con detalle la disponibilidá hídrica de cada zona, almacenar y aprovechar meyor l’agua cuando seya posible, modernizar sistemes de riegu onde resulten técnica y ambientalmente viables y evitar usos incompatibles cola escasez. La propia sanción pola captación d’agua del regatu Meredal pal campu de golf de Castiello ye una muestra de que la presión sobre los recursos hídricos yá nun ye una cuestión teórica.

Pero l’adaptación tien que dir bastante más allá del agua. Fai falta investigación aplicada al campu asturianu: ensayos con variedaes y ciclos de cultivu más resistentes a los episodios de calor y falta d’agua, revisión de les feches de sementera, diversificación de les fontes de forraxe, meyora de la estructura y materia orgánico de los suelos pa aumentar la so capacidá de retención, sistemes de siguimientu meteorolóxicu y alertes tempranes y asesoramientu agronómicu permanente a les esplotaciones. Nun hai una receta única que pueda copiase d’otros territorios: les soluciones tienen que probase científicamente nes condiciones de cada fastera d’Asturies y treslladase dempués al sector con sofitu públicu.

Esa mesma llóxica d’adaptación tendría d’aplicase al conxuntu del territoriu. Les polítiques forestales, agrícoles y hídriques nun pueden planificase por separao. Cuando 25 organizaciones reclamaben una moratoria a los nuevos plantíos d’ocalitos y reclamaben modelos forestales más adaptaos al cambéu climáticu, taben plantegando la mesma cuestión de fondu: decidir güei qué paisaxe productivu y qué ecosistemes van ser capaces de resistir les condiciones de les próximes décades.

Lo que nun resulta razonable ye esperar al próximu branu secu pa volver falar d’ayudes. Les indemnizaciones pueden salvar una collecha perdida o dar aire a una ganadería, pero nun fabriquen agua, nun recuperen un suelu degradáu y nun adapten un cultivu. La política agraria necesita pasar de reaccionar énte les catástrofes a anticipales. Eso significa financiar investigación, ensayos de campu, infraestructures razonables, asesoramientu técnicu y planes d’adaptación específicos pa la ganadería y los cultivos asturianos.

El 60% o’l 80% de perda nel maíz forraxeru d’esti añu tendría de funcionar como una alarma. Non porque tolos branos futuros vayan ser idénticos a esti, sinón porque les condiciones que fixeron posible esti dañu van ser cada vez menos excepcionales. El clima que conoció tradicionalmente’l campu asturianu ta cambiando. Esperar a que vuelva a ser como antes nun ye una política agraria. Preparar científicamente’l sector pa lo que vien, sí.

This work is licensed under a Creative Commons Attribution 4.0 International License.