Los menores de 35 años tienen güei más emplegu y menos temporalidá que va quince años, pero una persona de 25 a 34 años, con unos ingresos salariales medios de 21.000 euros al añu, tien de dedicar cuasi la metá del so salariu brutu al alquiler

La situación llaboral de la mocedá asturiana meyoró nos caberos años, en cuantes a disponibilidá de trabayu, pero esa evolución nun se ta convirtiendo nuna meyora equivalente de les sos condiciones de vida. Trabayar ya nun garantiza poder abandonar la casa familiar, alquilar una vivienda y desendolcar un proyectu vital independiente. Los datos d’un informe presentáu esti mes por CCOO d’Asturies dibuxen una paradoxa clara: los menores de 35 años tienen güei más estabilidá llaboral que va quince años, pero la precariedá d’esos trabayos ya’l coste de la vida, especialmente’l preciu de la vivienda ta absorbiendo bona parte d’esi avance.

Una persona d’ente 25 y 34 años que tea un trabayu indefiníu percibe de media unos 21.000 euros brutos al añu y, si quier alquilar una vivienda n’Asturies, tien que destinar de media’l 44,5% del salariu brutu namás a pagar la renta, a lo qu’hai que sumar el restu de los costes d’una vivienda, comu lluz, comunidá, agua y demás. Ye una proporción que supera con muncho’l 30% que tradicionalmente s’utiliza como referencia máxima pa considerar caltenible’l gastu residencial. La realidá confirma asina una situación de la que InfoAsturies yá venía alvirtiendo al analizar cómo l’alquiler imposibilita la emancipación de la mocedá asturiana: tener trabayu y cobrar regularmente nun significa tener accesu real a una vivienda.

El resultáu vese directamente nes cifres d’emancipación. En 2024, namás el 11,9% de les persones d’ente 16 y 29 años vivía fuera del llar familiar. Y la dependencia prolongase hasta edaes que va unes décades yeren plenamente adultes: ente los 30 y los 34 años trés de cada diez persones siguen viviendo cola familia. Asturies ye, amás, la segunda comunidá del Estáu con mayor sobreesfuerciu económicu de los llares mozos, comu s’alerta nel artículu “Vivir n’Asturies: cuando trabayar nun garantiza nin un techu”: el mercáu inmobiliariu ta dixebrándose cada vegada más de los salarios reales de la población.

Esta presión tien un orixen: l’aumentu de les viviendes destinaes a usos turísticos o esporádicos, la compra de segundes residencies y la concentración d’inmuebles como inversión reducen la disponibilidá de vivienda habitual en munches zones. El casu de Villaviciosa, onde más del 40% del parque residencial correspuende a segundes residencies o viviendes que permanecen vacíes bona parte del añu, ye un exemplu especialmente visible d’una dinámica que se reproduz con distintes intensidaes en bona parte del país. Cuando una vivienda dexa de competir nel mercáu residencial pola capacidá adquisitiva de quien vive y trabaya n’Asturies y pasa a competir como inversión, segunda residencia o productu turísticu, los salarios llocales parten en clara desventaxa.

Al mesmu tiempu, nel mercáu llaboral produxéronse cambios importantes. La temporalidá xuvenil baxó más de quince puntos nos últimos años y les xubíes del Salariu Mínimu Interprofesional tuvieron un impactu especialmente importante ente les persones menores de 35 años. Sicasí, la precariedá nun desapaeció: siete de cada diez contratos firmaos por menores de 30 años en 2025 fueron temporales, y la parcialidá algama’l 23,2% ente los 16 y los 34 años. Son datos que ponen llendes a cualquier llectura trunfalista y conecten con un problema estructural que quedó bien visible cuando el final de la temporada de branu devolvió más de 4.000 persones al desemplegu en setiembre de 2025, con un fuerte impactu sobre la mocedá.

La formación tampoco resuelve por sigo sola esti desequilibriu. Un 55% de les persones d’ente 25 y 34 años tien estudios superiores, pero cerca de trés de cada diez trabayen en puestos perbaxo de la so cualificación. Los datos oficiales de 2025 confirmen, amás, el nivel formativu particularmente altu de les xeneraciones moces asturianes, especialmente ente les muyeres. El problema, poro, nun pue reducise a una supuesta falta d’esfuerciu, preparación o disposición pa trabayar. La vieya cuestión de que “Asturies esporta talentos” sigue teniendo actualidá: formar una xeneración y nun ser quien a ufierta-y condiciones materiales pa desendolcar equí la so vida ye una perda económica y demográfica difícil de recuperar.

Amás de los contratos precarios, el primer contautu col mercáu llaboral sigue produciéndose en munchos casos al traviés de práctiques non remuneraes o con una función formativa discutible. El riesgu nun ye solo trabayar ensin cobrar: ye normalizar dende’l principiu les hores extra, la disponibilidad permanente, el mieu a reclamar derechos o l’aceptación de condiciones abusives cola esperanza de consiguir depués un puestu. El problema de la precariedá, por tanto, nun desapaez cola firma d’un contratu indefiníu; tamién tien que ver cola calidá del emplegu, los salarios, los horarios y la capacidá real que dexa esi trabayu pa construyir una vida independiente.

Los datos indiquen que la mocedá asturiana ta más formada y trabaya en condiciones meyores que va quince años; lo que sigue faltando ye que pueda permitise vivir del so trabayu.

This work is licensed under a Creative Commons Attribution 4.0 International License.