Andecha Astur torna subir al Puertu Tarna y a les trincheres del Abidular/Filispardi nel homenaxe al Conseyu Soberanu, revindicando el marcu de la Declaración de Soberanía de 1937 y llamando a convertir les vieyes trincheres de la guerra n’otres trincheres polítiques pa decidir el futuru d’Asturies

La bandera asturiana volvió a ondear ayeri nel altu’l Puertu Tarna, sobre les trincheres de L’Abidular-Filispardi, nel marcu del homenaxe añal al Conseyu Soberanu d’Asturies y Llión. Andecha Astur volvió llevar hasta esti rincón de la cordal la revindicación d’una Asturies soberana, xuniendo’l recuerdu de los que defendieron el país en 1937 cola defensa d’un futuru nel que, según la organización, el pueblu asturianu pueda decidir llibremente. Hai casi nueve décades, aquellos homes y muyeres que defendieron Asturies dende Tarna escavaron na montaña una llinia de resistencia. Güei, les trincheres siguen ellí, parcialmente cubiertes pola vexetación, silencioses, ensin disparos nin tropes, pero estraes entá de bales perdies y de resclavos d’heroicidá que cada agostu aconceya a decenes de persones reclamando aquella mesma soberanía; vuelven llenase de xente, vuelven escuchase discursos, tornen ondear asturines. Torna pronunciase una pallabra que pa Andecha Astur resume tanto’l pasáu como’l presente: soberanía. La Filispardi ye güei un llugar onde’l pasáu se convierte en memoria política. Un espaciu nel que les posiciones escavaes pa detener un exércitu se tresformen, nel discursu actual, nuna metáfora de la resistencia d’un país que considera pendiente la recuperación de la so capacidá de decisión.

La xornada del 16 d’agostu entamó pela mañana cola xubida a les posiciones defensives de L’Abidular-Filispardi, onde l’exércitu del Conseyu Soberanu sostuvo una de les llinies de resistencia frente al avance de les tropes franquistes y les fuercies alemanes ya italianes que participaben na ofensiva. Darréu, los participantes baxaron de nuevo al Puertu Tarna pa participar nel homenaxe políticu y na ufrienda floral énte’l monumentu dedicáu al Conseyu Soberanu.

La escena tien una importante carga simbólica. Les trincheres, escavaes na montaña por homes y muyeres que trataben de contener l’avance franquista, son güei’l puntu de partida d’una revindicación política que Andecha Astur vien calteniendo añu tres añu, recordar la soberanía proclamada’l 24 d’agostu de 1937 y reivindicala como “referencia histórica y apueste de futuru”.

La xubida a la Filispardi nun ye un elementu decorativu del homenaxe. Ye una parte fundamental d’una ceremonia política que busca poner a los participantes énte la realidá física d’aquella resistencia.

Nel actu de 2025, la xubida tuvo tamién como protagonista’l llantáu d’una asturina nes trincheres, nun xestu que pretendía xunir la memoria d’aquellos combatientes cola continuidá de la identidá asturiana. Naquella ocasión, los incendios qu’afeutaben a Asturies y Llión impidieron la presencia de parte de les persones que tradicionalmente participen nel homenaxe. (Andecha Astur llamó entós a recuperar la soberanía del pueblu asturianu pa decidir llibremente’l so futuru).

Esti añu, la bandera volvió ocupar el cielu de Tarna, nun escenariu onde la historia y la política vuelven atopase. Porque, pa Andecha Astur, mirar les trincheres ye mirar tamién una decisión tomada en 1937: la decisión del Conseyu Interprovincial d’Asturies y Llión de proclamase soberanu y asumir directamente les funciones de gobiernu y defensa del territoriu.

El 24 d’agostu de 1937, nel contestu de la Guerra Civil, el Conseyu Interprovincial d’Asturies y Llión pasó a denominase Conseyu Soberanu. La organización nacionaliega revindica esti Conseyu como la cabera institución democrática propia escoyida pol pueblu asturianu.

Andecha Astur señala que’l Conseyu asumió les funciones de gobiernu, organizó la defensa militar, impulsó una alministración propia y llegó a buscar reconocimientu internacional. El presidente del Conseyu, Belarmino Tomás, solicitó esi reconocimientu énte la Sociedá de Naciones. Son elementos que la organización lleva años incorporando al discursu del homenaxe, dexando claro que nun se trata de recuperar un episodiu comu una alcordanza hestórica o institucional, sinón de revindicar la capacidá del pueblu asturianu pa tomar decisiones sobre’l so propiu destín.

Nel discursu d’ayeri, esa idea volvió treslladase al presente. Andecha Astur plantega la soberanía como una cuestión imprescindible: decidir qué se fai colos recursos del país, cómo se xestiona’l territoriu, qué modelu económicu se quier, cómo se defende la vivienda y qué polítiques se ponen en marcha pa frenar el despoblamientu y la precariedá, ente munches otres cuestiones qu’afeuten a la vida de los asturianos.

La fecha del 24 d’agostu nun apaez aisllada nel discursu d’Andecha Astur. Forma parte d’una reivindicación más amplia de la soberanía asturiana que la organización venceya tamién cola declaración del 25 de mayu de 1808.

Nesi casu, la referencia ye la declaración realizada pola Xunta Xeneral d’Asturies nel contestu de la invasión napoleónica, fecha que Andecha vien reivindicando como una declaración de soberanía del pueblu asturianu. En 2021, la formación solicitó a la Xunta Xeneral que la conmemoración tuviera reconocimientu institucional. (La Xunta Xeneral llegó a tramitar aquella propuesta d’Andecha Astur).

La mesma reivindicación volvió apaecer nel 2024, cuando distintes organizaciones convocaron actos alredor del 25 de Mayu y recordaron el significáu soberanista que-y atribúin a aquella declaración. (Les convocatories asturianes del 25 M fueron recoyíes entós por InfoAsturies).

D’esta manera, Tarna forma parte d’una narrativa histórica más amplia: 1808, 1937 y el presente aparecen nel discursu como distintos momentos nos que la soberanía asturiana rescampló nel marcu hestóricu y les trincheres na piedra son la imaxe que Andecha Astur quier proyectar d’una Asturies que nun acepta que la so historia termine cola derrota, nin que’l so futuru venga decidíu dende fuera.

This work is licensed under a Creative Commons Attribution 4.0 International License.