Iniciativa pol Asturianu y la Cámara de Comerciu de Xixón entamen esti sábadu 15 d’agostu una nueva edición del Día de la Llingua Asturiana na FIDMA, con una programación que va combinar música, gastronomía, cine, cuentos, visites, presentaciones y reivindicación llingüística.

La V edición del Día de la Llingua Asturiana na Feria Internacional de Muestres d’Asturies va entamar a les 12:00 hores na entrada principal del recintu col pregón del periodista y escritor Pachi Poncela y la intervención de la presidenta d’Iniciativa pol Asturianu, Arantza Margolles. La música va correr a cargu de Leyre y Noa Miyar, con curdión y gaita.

A les 13:00 hores va realizase una visita institucional al stand d’Iniciativa pol Asturianu y, nel pabellón de Xixón, Marta Lozano va ufiertar una visita guiada n’asturianu. Media hora más tarde, nel stand d’El Comercio, va proyectase’l documental «50 años de la manifestación de Conceyu Bable», dedicáu a una de les movilizaciones fundamentales de la reivindicación llingüística asturiana.

La programación de tarde va entamar a les 17:00 hores col repartu de marañueles de Candás nel stand de Carreño y el showcooking «El pan nun se tira. Tresfórmase», a cargu de Panduru, nel pabellón del Conceyu de Xixón.

A les 18:00 hores, Andrea Lobo va protagonizar nel stand de Mieres un cuentacuentos pa la reciella con música, títeres y cuentos tradicionales. Una hora más tarde, nel espaciu de Conceyos Prestosos, va presentase’l caberu númberu de la revista Ver Asturies.

Un de los actos centrales va celebrase a les 20:00 hores nel stand de La Nueva España col alderique «15 años d’Iniciativa pol Asturianu», nel que van participar los tres presidentes que tuvo la organización, Inaciu Galán, Iván Llera y Arantza Margolles, moderaos pola vicepresidenta Claudia Elena Menéndez. L’alcuentru va repasar la trayectoria de la entidá, la evolución de la reivindicación llingüística y los retos de futuru del asturianu.

Durante tol día, nel espaciu del Conceyu d’Avilés, va poder participase na actividá «Xugando a les Pallabres Prestoses». La xornada va rematar a les 21:00 hores nel stand d’Iniciativa pol Asturianu col soplíu de veles polos 15 años de la organización.

Con esta quinta edición, la FIDMA vuelve convertise nun espaciu de difusión, usu y reivindicación del asturianu, mostrando la presencia de la llingua na música, la gastronomía, el patrimoniu, la creación audiovisual y l’actividá social.

This work is licensed under a Creative Commons Attribution 4.0 International License.