Quince años dempués, la presencia del asturianu na Feria Internacional de Muestres d’Asturies ye incomparablemente mayor. Hai empreses que lu utilicen con normalidá, instituciones que-y dan espaciu y hasta un Día de la Llingua dientro del recintu. Pero’l contraste sigue siendo evidente: la propia FIDMA continúa priorizando’l castellán como llingua vehicular nos sos mapes, folletos, señalización ya información al públicu
Caminar pela Feria Internacional de Muestres d’Asturies de 2026 permite atopar asturianu en munchos más espacios que va quince años. Esa ye una realidá incontestable. Otra cosa ye falar de normalización. La llingua d’Asturies sigue teniendo na FIDMA una presencia secundaria frente al castellán, especialmente precisamente ellí onde tendría que resultar más natural: na comunicación xeneral de la propia Feria.
Los visitantes siguen recibiendo mayoritariamente en castellán los mapes, folletos, indicaciones ya informaciones que vertebren el recintu. L’asturianu apaez sobre manera porque hai organizaciones, empreses y instituciones privaes que deciden utilizalu nos sos propios espacios, non porque la organización ferial lu tenga incorporáu como una de les llingües d’esti escaparate económicu y social del país.
Con too, la distancia respecto a la FIDMA de va quince años ye considerable. En 2011 acababa prácticamente de nacer Iniciativa pol Asturianu y nun esistía dientro de la Feria nada comparable al actual espaciu empresarial dedicáu a mostrar que l’idioma tamién sirve pa trabayar, producir y vender. La primer presencia específicamente reivindicativa documentada nun llegaría hasta 2017. Nueve años dempués, l’asturianu yá forma parte visible d’un certame pel que pasen cientos de miles de persones.
La manifestación más clara d’esti avance ta precisamente nel espaciu d’Iniciativa pol Asturianu, que celebra los sos quince años con un stand ampliáu nel pabellón 3-4 y cola participación de quince empreses y marques venceyaes a sectores como la edición, l’audiovisual, l’artesanía, l’agroalimentación, la moda, la traducción, la industria o les nueves tecnoloxíes.
Nun ye un detalle menor. Lo que se presenta na Feria ye un asturianu que dexa de tar acutáu a la reivindicación cultural pa funcionar como llingua de comerciu, comunicación, producción y creación de valor. Una realidá que foi creciendo nos caberos años y que puede vese tamién nel trabayu d’empreses y profesionales que desarrollen la so actividá n’asturianu.
Editoriales como Trabe, ún de los referentes históricos de la publicación n’asturianu, comparten güei espaciu con empreses tecnolóxiques, productores audiovisuales, artesanos o iniciatives agroalimentaries. La presencia de proyectos tan distintos desmonta de manera práctica la idea del asturianu como una llingua útil namái pa determinados ámbitos culturales. Casos como’l d’Ediciones Trabe y la so trayectoria na edición n’asturianu amuesen que detrás del idioma hai tamién actividá económica y profesional.
El cambéu empieza a percibise igualmente nos pabellones institucionales. L’asturianu tien presencia integrada nel espaciu del Gobiernu d’Asturies, volvió al de la Universidá d’Uviéu y l’Autoridá Portuaria de Xixón incorpora per primer vegada la toponimia oficial. Tamién ta presente nos espacios de Mieres, na rede de Conceyos Prestosos y n’otros proyectos presentes na Feria.
Son pasos positivos, pero la falta d’un criteriu común sigue siendo evidente. La presencia del idioma depende demasiáu de quién tea detrás de cada stand. Hai organismos que lu utilicen con naturalidá y otros que siguen actuando como si nun esistiera. La mesma irregularidá que se denuncia n’otros ámbitos públicos, como la escasa presencia del asturianu nos medios públicos, reproduzse a pequeña escala dientro del recintu ferial.
El casu del Conceyu de Xixón resulta especialmente significativu. Nel so pabellón, buena parte de los conteníos n’asturianu escuéndense tres códigos QR, mentes otres llingües disfruten d’una visibilidá directa. Quien quiera acceder a la información na llingua del conceyu tien que sacar el teléfonu y buscar aquello que tendría que tar a la vista. Nun ye una cuestión nueva: la política municipal vien siendo cuestionada pola discriminación del asturianu na cartelería de Xixón.
Per otru llau, la FIDMA va acoyer esti 15 d’agostu la quinta edición del Día de la Llingua Asturiana, otra muestra de cuánto cambió la situación. La evolución de los últimos quince años demuestra que nun había nengún impedimentu real. Cuando se-y da espaciu, l’asturianu entra con absoluta naturalidá na empresa, nel comerciu, na tecnoloxía, na cultura o na comunicación institucional. El problema nun ye que nun pueda usase: ye que tovía hai quien decide nun usalu ya incluso a quien-y molesta qu’otros lo usen.
Agora ye la propia Feria Internacional de Muestres d’Asturies la que tien de dar el siguiente pasu. Si los stands, les empreses y cada vegada más instituciones avancen, nun tien sentíu que la organización quede atrás. Ye hora de que la FIDMA asuma l’asturianu como llingua propia del país nel que se celebra y lu incorpore con normalidá nos sos mapes, folletos, señalización, programación ya informaciones al públicu.
This work is licensed under a Creative Commons Attribution 4.0 International License.
