AnimaNaturalis, CAS International y Asturies Antitaurina llevaron esti domingu 9 d’agostu a la Plaza’l Marqués una aición simbólica na que cerca de mediu centenar de persones recordaron a gües muertos nes places de toros. L’actu celebróse a pocos díes del entamu de la Feria Taurina de Begoña, prevista n’El Bibio del 13 al 17 d’agostu.
Cincuenta llábanes colos nomes d’animales muertos na cabera temporada taurina ocuparon esti domingu ún de los espacios más céntricos de Xixón. La iniciativa, entamada por AnimaNaturalis, CAS International y Asturies Antitaurina, axuntó alredor de cincuenta activistes na Plaza’l Marqués nuna protesta concebida pa poner nel centru a los animales que muerren nes corríes, precisamente cuando la ciudá ta a les puertes d’una nueva edición de la feria d’El Bibio.
La puesta n’escena buscaba tresformar en nomes concretos unes víctimes que, davezu, queden fora del discursu que presenta les corríes como fiesta, tradición o espectáculu. Cada participante portaba una llábana, construyendo una imaxe colectiva d’alcordanza frente a una actividá que sigue teniendo como resultáu la muerte pública de los animales. La protesta da continuidá a les movilizaciones que les organizaciones animalistes vienen realizando en Xixón y a iniciatives recientes como la concentración convocada por Asturies Antitaurina nes Lletrones de Xixón.
La presencia de la tauromaquia en Xixón contrasta, amás, con una tradición antitaurina documentada dende hai más d’un sieglu. En 1914, la Sociedá Antiflamenquista Cultural y Protectora d’Animales y Plantes yá impulsaba na ciudá movilizaciones contra la Feria de Begoña. Más de cien años dempués, les protestes siguen repitiéndose, como volvió demostrar el multitudinariu manifestamientu de 2025 contra les corríes d’El Bibio.
Porque la tortura como espectáculu nunca foi la forma asturiana de rellacionase colos animales. La cultura rural d’Asturies construyó históricamente una rellación col ganáu venceyada al trabayu, a la economía familiar y a la convivencia cotidiana, non a convertir el sufrimientu animal nun espectáculu públicu. La tauromaquia ye una tradición ayena dafechu a la nuesa cultura, metida a calzaor y pola fuercia al traviés d’un procesu d’homoxeneización cultural nel que l’españolismu convirtió les corríes nuna supuesta seña común d’identidá. Esa contradicción ente cultura asturiana y tauromaquia vien siendo señalada dende hai años, como recoyía InfoAsturies en «Asturies ye antitaurina».
El refugu social tampoco quedó llendáu a les movilizaciones d’agostu. Nos últimos meses, Asturies Antitaurina desendolcó distintes iniciatives contra la promoción de les corríes, ente elles la campaña de boicó a establecimientos que collaboren cola promoción taurina en Xixón. La reivindicación de fondu ye la mesma: que la ciudá dexe d’acoyer espectáculos basaos nel sufrimientu y muerte d’animales.
Les corríes dexaron de celebrase n’El Bibio tres la retirada, a finales de 2021, de la concesión a la empresa que xestionaba la feria taurina. La decisión llegó dempués de la polémica provocada pola corrida na que dos animales recibieron los nomes de «Feminista» y «Nigeriano». La posterior vuelta de Carmen Moriyón a l’Alcaldía abrió de nuevu les puertes de la plaza a la actividá taurina, recuperándose unes corríes que llevaben dos temporaes ensin celebrase. La situación y la responsabilidá institucional nel caltenimientu de la tauromaquia fueron analizaes recientemente n’InfoAsturies en «El Principáu sigue ensin atrevese a acabar colos toros».
L’aición d’esti domingu na Plaza’l Marqués recuperó, asina, una idea bien cenciella: detrás de cada cartelu taurín hai animales concretos que van ser feríos y muertos. Frente a la identificación institucional de la tauromaquia cola tradición española, Xixón tien tamién una tradición propia y documentada: la de salir a la cai a refugar les corríes.
This work is licensed under a Creative Commons Attribution 4.0 International License.
