A les propuestes del vencedor del Loïc Raison y el conciertu de Capercaillie, esti añu se suma la música lleutrónica de raigañu de los bretones PERCEVAL y NOON, ente otros.

El Festival Intercélticu de Lorient ye un puntu d’alcuentru de munches opciones musicales; principalmente, les más tradicionales, con toles delegaciones participantes representaes nún o tolos escenarios del festival. Sicasí, tamién tienen llugar otres apuestes: va cinco ediciones se sumaba’l primer escenariu pa la escena mozo, Le Kleub, y esti añu cumple dos ElectroFIL, la nueche dedicada íntegro a la música lleutrónico de raigañu celta nel escenariu Jean-Pierre Pichard, qu’enllenó l’aforu.

La nueche entamó con Fleuves, un grupu que fusiona la sonoridá tradicional bretona vocal col ecu del jazz más tranquilu y los acentos lleutrónicos, que convidaron a tola xente asistente a formar an dro y calentar motores colos plinn. L’ánimu quedó per tolo alto cuando dio tira sobre l’escenariu DJ Miss Blue, que supo caltener la tensión ente Fleuves, l’actuación de PERCEVAL y la última intervención de la nueche, NOON, ensin cansar a la concurrencia enantes de tiempu.

El puntu fuerte, sicasí, foi PERCEVAL, DJ y productor musical de Rennes, creador del soníu “techno medieval”, nel que fusiona lo bretón, la recreación melódica y cíclica medieval, colos beats y drops de la música lleutrónica más marcada. El músicu, qu’acaba d’estrenar el cenciellu Katapulte, ta en mediu d’una xira per tol estáu francés onde enllena sales de manera sistemático, y esto pudo vese na ciudá de los seis puertos: cascu na cabeza y kilt puestu, nun hebo  quién quedara indiferente a la fiesta que llevó n’escena.

Pa poner el ramu d’esta segunda edición d’ElectroFIL xubieron los mozos de NOON, que mezclan el soníu trap y lleutrónicu, nesti casu, cola polifonía de les gaites y la tradición bretona. Esti grupu  xubió al escenariu de Le Kleub na edición del festival de 2024, dedicada a la mocedá de los países celtes, y dexó naguando a tola xente asistente. La gana pudo vese, porque abrazaron tanto los temes del EP Run como les propuestes inédites con una gana lloca de folixa na última nueche del 55u Festival Intercélticu de Lorient.

This work is licensed under a Creative Commons Attribution 4.0 International License.