El Conseyu de Transparencia y Bon Gobiernu estimó la reclamación presentada por horru.online y requirió al Ayuntamientu d’Illas la entrega de la documentación solicitada, pero’l consistoriu anunció un recursu contenciosu-alministrativu contra esa resolución, siendo ya tres los contenciosos nos qu’entra esti conceyu con tal d’ocultar información
El conflictu alredor del accesu a la información pública sobre una panera situada en Taborneda, nel conceyu d’Illas, llegó a la Audiencia Nacional depués de que l’Ayuntamientu anunciara la interposición d’un recursu contenciosu-alministrativu contra la resolución del Conseyu de Transparencia y Bon Gobiernu (CTBG) que-y obligaba a facilitar la documentación solicitada.
La resolución del CTBG, con fecha 21 de mayu de 2026, estimó parcialmente la reclamación presentada y instó al consistoriu illense a entregar, nun plazu máximu de 20 díes hábiles, la información relativa a una panera de Taborneda, amás de remitir al propiu Conseyu copia de la documentación facilitada.
El procedimientu entamó cuando horru.online solicitó información al Ayuntamientu d’Illas sobre la panera de Taborneda, información que se-yos negó, como ya va ocurriendo n’otres ocasiones nesti conceyu.
El 11 de xunu de 2026, tres la resolución favorable del Conseyu de Transparencia, recibióse la estimación de la reclamación, que reconocía’l derechu d’accesu a la información solicitada y requiría al Ayuntamientu d’Illas pa que la facilitara.
Al nun recibir la documentación, el 9 de xunetu de 2026 presentóse una nueva reclamación énte’l Conseyu de Transparencia denunciando la falta de cumplimientu de la resolución.
Cuatro díes depués, el 13 de xunetu, presentóse tamién un nuevu escritu énte’l propiu Ayuntamientu d’Illas solicitando’l cumplimientu de la resolución.
La respuesta del Conseyu de Transparencia comunicada’l 21 de xunetu informó de que l’Ayuntamientu d’Illas decidiera recurrir la resolución énte la xurisdicción contencioso-alministrativa. Según la comunicación recibida, el consistoriu solicitó tamién la suspensión cautelar de la entrega de la información.
Según la información facilitada por horru.online, esti sería’l tercer procedimientu contenciosu-alministrativu promovíu pol Ayuntamientu d’Illas en rellación con resoluciones sobre accesu a información pública.
Dos d’ellos taríen venceyaos a solicitúes realizaes por horru.online, ente elles la correspondiente a la panera de Taborneda. El terceru correspondería a un procedimientu relacionáu cola información solicitada por un vecín del conceyu sobre un depósitu d’agua.
El propiu Conseyu de Transparencia señala na so resolución que les reclamaciones nesta materia sustitúin los recursos administrativos y que les resoluciones del organismu pueden ser recurríes énte la Sala de lo Contencioso-Alministrativo de l’Audiencia Nacional.
El casu d’Illas vuelve poner sobre la mesa’l funcionamientu de los mecanismos de transparencia y el derechu de la ciudadanía a solicitar información a les alministraciones públiques.
N’Asturies, distintes reclamaciones ante organismos de transparencia vienen poniendo’l focu nos últimos años na necesidá de garantizar l’accesu efectivu a la información pública. La resolución sobre la panera de Taborneda entra agora nuna nueva fase xudicial, pendiente de la tramitación del procedimientu énte l’Audiencia Nacional.
This work is licensed under a Creative Commons Attribution 4.0 International License.
