Digital Valley Asturias promete convertir Salas nun referente tecnolóxicu, pero la dimensión del proyectu abre interrogantes sobre financiación, consumu enerxéticu, agua, emplegu real y impactu territorial que van precisar respuestes concretes.

Asturies tien ante sí unu de los mayores anuncios d’inversión de la so historia reciente: un campus de centros de datos nel conceyu de Salas con una inversión prevista de 1.226 millones d’euros, diez módulos de procesamientu y almacenamientu de datos y una capacidá informática final de 120 megavatios.

La presentación del proyectu llegó acompañada de grandes cifres: una infracadarma vinculada a la intelixencia artificial, la computación na nube y la economía dixital, con más de mil emplegos previstos y un impactu económicu multimillonariu. Pero xunto col anunciu de la inversión surden otres preguntes que van más allá del titular.

Porque nun basta con saber cuánto cuesta un proyectu. Tamién ye necesario conocer quién pon esos fondos, qué parte ta comprometida y qué parte depende de previsiones futures.

Una de les cifres que más llamó l’atención foi la de los 3.000 emplegos. Esa cantidá fai referencia al máximu de trabayadores que podría llegar a participar na fase de construcción de la infracadarma, prevista ente 2027 y 2030. La pregunta clave ye qué va quedar cuando les obres terminen.

Les previsiones del proyectu falen de 1.318 emplegos directos, indirectos ya inducíos una vegada en funcionamientu, pero los puestos directamente venceyaos al centru de datos rondaríen los 120. Esta diferencia fai necesario distinguir ente emplegu temporal asociáu a la construcción y emplegu permanente venceyáu a la actividá futura.

Asturies tien una larga esperiencia de grandes anuncios industriales acompañaos de promeses d’ocupación. Por eso, más allá de la cifra inicial, l’interés social ta en saber cuántos puestos estables van quedar nel territoriu y qué perfil profesional van precisar.

Per otu lláu, el proyectu presenta la caltenibilidá como unu de los sos elementos centrales. El campus reservará un 28% del espaciu pa zones verdes ya incorporará una instalación fotovoltaica con 350 paneles solares.

Pero nun centru de datos d’esta dimensión la cuestión principal ye otra: cuánta enerxía va consumir, d’ónde va salir esa enerxía y qué necesidaes va xenerar.

Un campus con diez módulos de centros de datos y 120 megavatios de capacidá informática va precisar un suministru constante les 24 hores del día. La presencia de paneles solares ye un elementu positivu, pero por sí sola nun responde a toles cuestiones sobre consumu enerxéticu, eficiencia y dependencia de la rede.

Tamién queda por conocer con precisión l’impactu sobre los recursos hídricos y les soluciones previstes pa la refrixeración de la instalación, un asuntu especialmente relevante nuna época marcada polos episodios de seca y los efectos del cambiu climáticu.

Digital Valley Asturias aspira a ser declarada Proyectu d’Interés Estratéxicu Rexonal y ocupará una superficie de más de 154.000 metros cuadraos nel polígonu de Nonaya, en Salas.

La llegada d’una incadarma tecnolóxica d’estes dimensiones puede representar una oportunidá pa diversificar la economía asturiana, atraer inversión y xenerar actividá nun territoriu del occidente que lleva décades enfrentándose a perda de población y falta d’oportunidaes.

Pero precisamente pola importancia del proyectu, la ciudadanía tien drechu a conocer tolos detalles: la cadarma financiera, les posibles ayudes públiques, les obligaciones de la empresa promotora, los consumos previstos, los controles ambientales y les garanties sobre l’emplegu. La falta d’información completa sobre costes, beneficios y compromisos fae temer ya a parte de la población la ocultación d’información fundamental sobre la viabilidá ya impactu real del proyectu más allá de promeses y titulares.