El grupu, fundáu en 2017, acude por primera vez a la capital del interceltismu como parte de la Delegación Asturiana.

El Festival Intercélticu de Lorient / An Oriant ye l’escaparate más destacáu de la cultura intercéltica nel mundu; prueba d’ello son les 55 ediciones que lleva na so hestoria. El fechu de participar nél como artista fala yá de la calidá de les propuestes culturales de los grupos; abrir l’espectáculu Danses du Monde celte, el primeru qu’axunta formaciones de toles delegaciones participantes, ye un privilexu. Y esti añu foi el turnu del Grupu Etnográficu L’Oriente-Llacín, que representa a Asturies por primer vez.

La Place des Pays celtes, ún de los espacios d’accesu llibre del festival, acoyía a cientos de persones a la hora d’entamar l’espectáculu, que tuvo llugar de les 14:00 a les 17:30 del pasáu sábadu 1, nes hores de más sol y calor. Pero la espectativa bien pagó la pena: L’Oriente llevó bailes de tol país al escenariu lorientés y dexó al públicu naguando.

La so propuesta axuntaba instrumentalización, cantares y baille, con una presencia que s’espurría per cada requexu. El grupu, integráu dende 2019 na cadarma de l’Asociación Cultural Llacín, presentó pieces tanto conocíes del repertoriu avezáu, como otres investigaes y divulgaes. Amás, el so vestuariu reflexó tamién la variedá del traxe’l país, refugando la uniformización qu’a vegaes prioricen estes formaciones. Asina foi que, al rematar la so parte de l’actuación, hubieron tornar a salir al escenariu pa echar unes cuantes pieces más.

Nestos díes participen nes 5 nueches de Horizons celtiques (del sábadu 1 al xueves 6), la Grande Parade des Nations Celtes (domingu 2), el Musiques et Danses des Pays Celtes (el miércoles 5); tamién van impartir el Atelier de danses asturiennes el xueves 6 y animar en dellos pasucais y na cena temática d’Asturies el llunes 3.

Dende equí deseyámos-yos el mayor ésitu.

This work is licensed under a Creative Commons Attribution 4.0 International License.