Cornualles —Kernow en córnicu— ocupó dende la primer nueche’l centru de la 55ª edición del Festival Intercélticu d’An Oriant, baxu’l llema «Cornualles, nel coral de la mar Celta». El país protagonista d’esta edición abrió la so participación con Kernowcopia, un espectáculu qu’amiesta teatru y música, concebíu xustu pa la cita bretona y presentáu nel Palaciu de Congresos.

El festival cellébrase del 31 de xunetu al 9 d’agostu y torna a tresformar Lorient demientres diez xornaes nun puntu d’alcuentru de les cultures celtes. La muerganización anuncia más de 300 conciertos y actividaes delles ente doce escenarios, cola participación d’alrodiu 5.000 músicos, cantantes, baillarinos, artistes visuales, investigaores y cineastes. La programación xune grandes espectáculos, pasucáis, conciertos en sales y tabiernes, concursos instrumentales, conferencies, mercaos y actividaes caleyeres.

Once años dempués de la cabera edición dedicada a Cornualles, el Festival Intercélticu recupera esti territoriu como convidáu principal y sitúa la so cultura marítima nel cientru de la programación. La intención ye reforciar les pontes culturales ente les dos orielles del canal de la Mancha y prestar una atención especial a la rellación de los pueblos celtes del arcu atlánticu cola mar.

Kernowcopia furruló como una presentación musical d’esa identidá. El so nome xuega cola idega del cuernu de l’abondancia y col nome córnicu de Cornualles, Kernow. L’espectáculu axuntó nun mesmu escenariu al coru mistu Barret’s Privateers, al grupu Skillywidden y a un dúu d’intérpretes de música tradicional. Les tres formaciones nun se socedieren como davezu, sinón que compartieron l’escenariu, participando xuntes nuna creación camentada como una cellebración colectiva.

La propuesta tomó como filu conductor una lleenda humorística sobre la ñacencia de Cornualles. Según el relatu, Dios repartiera tierres ente los distintos pueblos, pero escaeciera reservar una pa los córnicos, porque taben toos nel pub bebiendo sidra y cerveza. Estos abellugáronse entós nuna tabierna y entamaron a caciar pa sobrellevar la inxusticia. La música acabó convenciendo a la divinidá que, dempués de la folixa, concedió-yos una península con forma de cuernu asomáu na mar.

La hestoria permitió construyir una representación desenfadada na que l’humor, la narración y la música tradicional reforciáronse mutuamente.

La programación de 2026 va siguir desendolcando esa perspeutiva al traviés de conciertos, esposiciones, alcuentros y grandes produciones. Ente les cites centrales figura la Gran Parada de les Naciones Celtes, prevista pal domingu 2 d’agostu, amás de les destremaes representaciones de Horizons Celtiques y de les velaes dedicaes a los territorios participantes.

El cartelu inclúi artistes y formaciones de procedencies y estilos bien diversos, dende figures consolidaes como Yann Tiersen, Agnes Obel o Carlos Núñez fasta propuestes de música tradicional, rock, creación sinfónica y nueves fusiones.

Kernowcopia condensó esi propósitu na primer nueche. La creación partió d’una lleenda antigua, axuntó instrumentos de tradiciones diferentes ya incorporó ritmos inesperaos pa construyir una celebración de Cornualles alloñada de los tópicos. Ente cantares de tabierna, metales, cuerdes y humor, la nación protagonista atopó finalmente’l so territoriu y el Festival Intercélticu de Lorient consiguió una apertura a l’altura de la so edición más marítima

This work is licensed under a Creative Commons Attribution 4.0 International License.