El sábadu 1 d’agostu tuvo llugar la tradicional cita pa escoyer al meyor gaiteru del Festival Intercélticu de Lorient, el tornéu MacCrimmon, que yá va pola so 39ª edición. Nél, xúntense los ocho nomes más destacaos de Galicia y Asturies, cuatro de cada país. Nesta ocasión, representaron a Asturies Nel Cortizo Verdejo, Pelayo Cordero Vega, Diego Lobo Tuñón y Pelayo Suárez Rodríguez; Galicia tuvo a Héctor Lomba Villa, Manuel Seoane Sánchez, Ismael García del Río y Antón Franco. Foi Seoane’l ganador d’esta edición.
Los concursantes han d’interpretar pieces de les tres naciones celtes que formen el xuráu, Bretaña, Asturies y Galicia, p’amosar el so dominiu del rexitru musical y el conocimientu del instrumentu y les sos variaciones a lo llargo del arcu atlánticu.
Ye de destacar que’l troféu marchó p’Asturies en 25 de les 39 ediciones y solo foi ganáu por muyeres en dos ocasiones (tovía): en 2010 con Andrea Joglar, que recibió mención d’honor pol llogru; y en 2019 con Maria López, qu’amás de ser la primer gallega en vencer, foi la ganadora más moza na hestoria del concursu, con 14 años. L’anterior ganador más mozu fuera Diego Pangua (2000), con 16 años.
La masterclass de gaita del próximu miércoles 5 d’agostu va correr a cargu de Diego Lobo Tuñón, direutor de la Banda Gaites El Gumial de Morea y Banda Gaites Saxum de Xixón. Lobo fízose col troféu na edición de 2024.
This work is licensed under a Creative Commons Attribution 4.0 International License.
