Decenes de persones concentráronse esti miércoles xunto al edificiu de la Gota Llechi pa recordar a les 61 muyeres asesinaes no que va d’añu -13 d’elles namás esti mes- y reclamar prevención, educación, xusticia y recursos públicos.

La convocatoria mensual de la Plataforma Stop Violencies, que se cellebra cada últimu miércoles de mes, busca facer visible’l doliosu contador de muyeres asesinaes y reiterar la refuga social énte los crímenes machistes.

Nel trescursu del actu lleéronse con solemnidá los nomes de les víctimes mortales rexistraes no que va de 2026, que yá sumen 61. La llectura pretende evitar que les asesinaes queden convertíes nuna simple cifra y recordar que detrás de cada nome hai una vida truncada, una familia golpeada y un entornu marcáu pola violencia.

La concentración cuntó col sofitu de distintos coleutivos feministes, sindicales, políticos y sociales. Ente les organizaciones presentes taben Andecha Astur, Anticapitalistes, Amamantar, l’Asociación de Pensionistes de Xixón, l’Asociación Ecofeminista Petra Kelly d’Asturies, el Colectivu de Trabayadores, Feminismu en Llucha de la CSI, la plataforma del Serviciu d’Ayuda a Domiciliu, Podemos y Verdes–Equo.

La intervención central corrió al cargu d’una representante del Serviciu d’Ayuda a Domiciliu, que recordó que la violencia machista representa “una grave vulneración de los drechos humanos” ya una torga pa construyir una sociedá más xusta ya igualitaria.

Nel manifiestu insistióse en que cada muyer asesinada nun ye un casu aislláu, sinón la consecuencia más brutal d’una violencia estructural que tamién se manifiesta nel ámbitu familiar, llaboral, social y dixital. La voz de la concentración alzóse poles muyeres que viven con mieu nes sos cases, poles que sufren acosu nel trabayu, na cai, nel móvil o nes redes sociales, y poles neñes a les que la violencia-yos roba la infancia.

La representante del SAD reclamó que la respuesta istitucional nun quede reducida a minutos de silenciu y pidió una prevención efectiva basada na educación nel respetu y na igualdá. Tamién defendió la necesidá de formar a toles persones que participen nos procedimientos abiertos tres una denuncia, cola mira d’evitar que la víctima sufra nuevos cuestionamientos, desproteición o maltratu institucional.

La intervención llamó amás a reconocer les formes menos visibles de la violencia machista, que munches vegaes entamen de manera sutil al traviés del control, la manipulación, l’aisllamientu y la violencia sicolóxica. Énte esta realidá, les participantes reclamaron xusticia, educación y recursos suficientes pa prevenir les agresiones y garantizar la protección y l’acompañamientu de les víctimes.

“Queremos una sociedá qu’eduque na igualdá y que castigue al agresor, non a la víctima”, señaló’l manifiestu, que remató cola reivindicación de poder vivir llibres y ensin mieu.

La concentración preslló col compromisu de siguir ocupando l’espaciu públicu mientres una sola muyer siga sufriendo violencia y col glayíu colectivu que resume la reclamación del movimientu feminista: “Por elles, por nós y poles que vienen: ¡nin una menos!”.

This work is licensed under a Creative Commons Attribution 4.0 International License.