En plena fola calor los trabayadores del Hotel La Colmena recibieron un comunicáu llendando’l consumu de productos y afitando un preciu de 20 céntimos por cada cubin de xelu que gasten. La midida foi denunciada por CGT como una práctica abusiva y humillante nun sector marcáu pola dureza de les xornaes y la presión llaboral.

Les persones trabayadores del Hotel La Colmena de L.luarca tienen de pagar 20 céntimos por cada cubín de xelu qu’utilicen durante la so xornada, según una denuncia fecha pública estos díes. La empresa unvió a la plantiya un comunicáu internu nel que se llenda’l consumu de productos del establecimientu y se recueye esti cobru.

La midida afecta a un elementu tan básicu como’l xelu necesario pa enfriar un vasu d’agua o un café durante la xornada. Según la denuncia, estes consumiciones formaríen parte de la manutención reconocida nel conveniu del sector, polo que se considera inaceptable que la empresa obligue al personal a pagales del so propiu bolsu.

La decisión resulta especialmente llamativa nun sector como la hostelería, caracterizáu por xornaes llargues, ritmos intensos y una importante carga física y emocional. Son les plantiyes les que sostienen diariamente’l serviciu, atienden a la clientela y permiten el furrulamientu de los establecimientos, polo que cobrar por un recursu de coste mínimu interprétase como una falta de respetu hacia’l so trabayu.

Quienes denunciaron la situación califiquen la práctica d’abusiva y humillante. Recuerden que’l coste del xelu forma parte de los gastos ordinarios del hotel y sufrágase cola propia actividá del negociu. Convertir cada xelu nuna consumición de pagu pa la plantiya nun tendría, por tanto, una xustificación económica razonable y roza l’absurdu.

Más allá de los 20 céntimos, el casu abre un debate sobre’l tratu que reciben les persones trabayadores na hostelería asturiana. Les condiciones llaborales nun se miden namás nel salariu o nel númberu d’hores, sinón tamién nel respetu cotidianu, nel accesu a recursos básicos y na forma en que les empreses se rellacionen coles sos plantiyes.

La denuncia reclama una hostelería que valore l’esfuerciu del personal y garantice unes condiciones dignes. Cobrar a una persona trabayadora por enfriar un vasu d’agua en plena fola calor nun representa un aforru significativu pa una empresa, pero sí tresmite una imaxe clara sobre la consideración que merez quien sostién el serviciu cada día.