La Xunta Xeneral del Principáu d’Asturies vivió ayeri una nueva xornada de protesta contra’l proyectu pa quemar residuos na central térmica de La Pereda, en Mieres. Convocaos por distintos colectivos ciudadanos y ambientales, decenes de persones concentráronse coincidiendo col alderique parlamentariu pa reclamar la paralización definitiva de la iniciativa y recordar un mensaxe que vien repitiéndose dende hai años: «Quemar basura mata».
Los manifestantes denunciaron que’l proyectu sigue alantre magar les resoluciones del Tribunal Superior de Xusticia d’Asturies que declararon nules decisiones clave venceyaes cola tramitación de la planta. Critiquen que’l Gobiernu del Principáu autorizara la continuidá de les obres mientres se tramiten los procedimientos necesarios pa intentar regularizar la situación.
Mientres la concentración, los participantes insistieron en que’l debate nun trata namái de la xestión de los residuos, sinón del modelu d’Asturies que se quier construyir pa les próximes décades. Al so xuiciu, una instalación d’estes característiques necesita funcionar durante munchos años y alimentase de manera permanente de grandes cantidaes de residuos, polo que nun favorez la reducción de la basura nin una economía más circular.
Los colectivos movilizaos tamién refugaren l’argumentu de que la incineración suponga una solución pa la creación d’empléu. Defendieron que la comunidá precisa puestos de trabayu estables y de calidá, pero compatibles cola protección del mediu ambiente, la salú pública y el futuru del mediu rural.
Otra de les reivindicaciones presentes na concentración foi la necesidá d’aplicar el principiu de precaución. Los participantes espresaron la so preocupación polos posibles efectos de les emisiones sobre la calidá del aire, de l’agua y de los alimentos, y reclamaron que la protección de la salú de la población tenga prioridá na toma de decisiones.
Con pancartes y consignes contra la incineración, los asistentes fixeron un llamamientu a apostar por polítiques que dean prioridá a la prevención, la reutilización y el reciclaxe, frente a la quema de residuos. La movilización desenvolvióse mientres nel interior de la Xunta Xeneral los grupos parllamentarios debatíen sobre’l futuru del proyectu, nun conflictu que sigue abiertu tanto nel ámbitu políticu como nel xudicial.
This work is licensed under a Creative Commons Attribution 4.0 International License.
