El Principado apuesta pol transporte públicu “pa meyorar los desplazamientos a los principales enclaves turísticos y espacios naturales del oriente asturianu”. Con esa declaración d’intenciones el gobiernu d’Asturies dexa nidio pa quien busca meyores y non, nun ye pa la población asturiana.

Cada branu repítese la mesma escena. Miles de vehículos colapsen les carreteres del Oriente d’Asturies, los pueblos ven desbordada la so capacidá y los espacios naturales carecen una presión creciente. Énte esta situación, el Gobiernu del Principáu vuelve anunciar un refuerciu del tresporte públicu, ensin disimular que les necesidades que se pretende cubrir nun son les de la población, sinon “facilitar una alternativa accesible, cómoda y segura pa disfrutar d’Asturies” , ello ye, poner Asturies en bandexa al turismu mientres les zones rurales asturianes siguen careciendo d’un abandonu endémicu.

Les nueves midíes nun nacen pa responder la demanda histórica de la vecindá del Oriente de meyores comunicaciones ente los sos pueblos, sinón pa facilitar l’accesu del turismu a los principales destinos de la zona. L’oxetivu, espresáu ensin disimulu pol Principáu ye reducir el tráficu priváu y garantizar que miles de visitantes puedan llegar con mayor comodidá a llugares como Cuadonga, los Llagos, Cangues d’Onís o les principales sableres de la mariña oriental.

Entantu, munchos pueblos del Oriente –y d’Asturies entera- siguen careciendo una escasísima ufierta de tresporte públicu. Les frecuencies son insuficientes, hai parroquies que namái disponen de dalgunos servicios a la selmana y los horarios nun s’afaen nin a les necesidaes llaborales nin a les educatives nin a les sanitaries de la población. Pa miles de vecinos, disponer d’un vehículu particular sigue siendo una necesidá más que una opción y la falta de movilidá ye un de los principales argumentos p’abandonar los pueblos.

Sicasí, cuando l’oxetivu ye absorber el fluxu de visitantes de los meses d’estíu, apaecen servicios especiales, refuerzos y campañes institucionales, poniendo’l tresporte públicu ye al serviciu del turismu, en llugar de ser una erbía pa garantizar el nivel de vida de  la ciudadanía.

El despoblamientu del mediu rural ye un de los grandes retos d’Asturies. Afrontalu implica, pente otres cuestiones, asegurar servicios públicos dignos mientres los doce meses del añu y afayaos a los horarios, percorrios y necesidades de la población, non del visitante. Per otru llau el despoblamientu d’Asturies tien una ventaxa pa les intenciones de quienes gobiernen Asturies: l’Asturies vaciada dexa un ampliu espaciu disponible al serviciu del turista y del especulador inmobiliariu.

This work is licensed under a Creative Commons Attribution 4.0 International License.