La Coordinadora Ecoloxista d’Asturies denunció una nueva «espiral d’autorizaciones» de parques de bateríes tres la espublización nel Boletín Oficial del Principáu d’Asturies (BOPA) de la tramitación d’una nueva instalación nel polígonu de Veriña, en Xixón. La organización considera que’l Gobiernu del Principáu sigue impulsando esti tipu de proyectos ensin atender les reticencies manifestaes por dellos conceyos y pola vecindá afeutada.
El colectivu señala que’l Principáu continúa cola tramitación industrial y de la conexón eléctrica del parque de bateríes conocíu como Salones, allugáu na zona de La Peñona, en Veriña, malpenes depués de que’l Conceyu de Xixón espresara públicamente’l so compromisu de nun conceder llicencies urbanístiques a esti tipu d’instalaciones nos polígonos industriales por considerales incompatibles col Plan Especial d’esa área.
Dende la Coordinadora Ecoloxista consideren «sorprendente» que’l Principáu siga alantre cola tramitación al entender que les competencies urbanístiques correspuenden al conceyu. Na so opinión, esta actuación contradiz la posición manifestada pol Gobiernu municipal énte les demandes de la vecindá.
La organización tamién cuestiona’l volume de proyectos que se tán tramitando n’Asturies. Recuerda que’l Gobiernu asturianu comprometióse nel so día a llindar la capacidá d’almacenamientu a 300 megavatios, una cifra que, al so xuiciu, yá quedó llargamente superada. Namái nel conceyu de Xixón aseguren que s’atopen en tramitación pública 17 parques de bateríes.
La Coordinadora afirma que la so principal preocupación ye la cercanía prevista ente munches d’estes instalaciones y les zones habitaes. Según esplica, esa proximidá podría xenerar afecciones sobre la vecindá y la fauna, al empar que reclama una mayor evaluación de los posibles efectos sobre la salú y el mediu natural.
El colectivu amuesa tamién la so preocupación polos riesgos asociaos a una posible fuga térmica o a un incendiu nes bateríes de ión-litiu. Na so opinión, un accidente d’estes característiques podría tener consecuencies graves pa les persones residentes nes proximidaes y pal entornu ambiental, tanto poles sustancies que podríen lliberase como poles dificultaes na estinción d’esti tipu de fueos, qu’en dellos casos precisen grandes cantidaes d’agua, cola consiguiente xeneración d’agües potencialmente contaminaes.
La organización considera, por ello, que nun tendríen d’autorizarse instalaciones d’estes característiques cerca de núcleos de población, espacios d’interés ambiental o zones protexíes.
Según el recuentu realizáu pola Coordinadora Ecoloxista d’Asturies, na actualidá conocen 91 proyectos de parques de bateríes repartíos por distintos conceyos. Ente ellos figuren Salas, Grandas de Salime, Siero, Llanera, Mieres, Cangues d’Onís, Uviéu, Avilés, Corvera, Ḷḷena, Colunga, Villaviciosa, Ribera de Riba, Les Regueres, Xixón, Candamu, Gozón, Piloña, Grau, Carreño, Cangas del Narcea, Llangréu, Ribadeva, Ribeseya, Samartín del Rei Aurelio, Cabrales y Degaña. Xixón, con 17 iniciatives en distintes fases de tramitación, ye’l conceyu que concentra’l mayor númberu de proyectos, siguíu d’Uviéu, con once, y Gozón, con ocho.
This work is licensed under a Creative Commons Attribution 4.0 International License.
