Asturies Antitaurina va celebrar esti xueves, a les 19.30 hores, una acción reivindicativa nes Lletrones de Xixón con motivu del Día Mundial Antitaurinu. La convocatoria busca visibilizar el refugu a les corríes de toros y reivindicar una llucha que’l colectivu venceya cola xusticia, la empatía y el respetu a los animales.

Movilización antitaurina en Xixón

“Xixón ye antitaurina, y eso ye precisamente lo que queremos revindicar”, señalen dende la organización. El colectivu defende que la mayor parte de la sociedá asturiana ta en contra de les corríes de toros, magar que, según denuncien, dellos representantes políticos intenten tresmitir otra imaxe y los medios de comunicación sigan dedicando espaciu a la tauromaquia.

La convocatoria llega nun momentu nel que vuelve tar enriba la mesa l’alderique sobre la presencia de menores nos espectáculos taurinos y cuando les corríes de toros en Xixón encaren una nueva edición tres la so recuperación en 2023. Pa Asturies Antitaurina, estes práctiques constitúin una forma de maltratu animal que nun tien cabida nuna sociedá que se reconoz respetuosa colos derechos de los animales.

La presidenta del colectivu, Medea López, recuerda que, según los datos que remana la organización, más del 77% de la población  refuga esta tradición. Amás, destaca que les movilizaciones antitaurines que cada mes d’agostu se celebren n’Asturies, coincidiendo cola Feria de Begoña, tán ente les más numberoses del país. “A pesar de que muncha xente ta de vacaciones, más de mil persones movilícense polos derechos d’otros, de los animales, y eso tien entá más méritu”, señalen dende Asturies Antitaurina.

El refugu a la tauromaquia tien en Xixón una trayectoria histórica amplia. Recuerden que los manifestamientos escontra les corríes de toros repítense dende 1914, cuando la Sociedá Antiflamenquista Cultural entamó un actu públicu pa reclamar l’anulación de la Feria de Begoña, organizada daquella “con envís d’atrayer turistes”.

La relación tradicional d’Asturies colos animales ye bien distinta a la cultura taurina española y nun almite la crueldá pa con ellos, menos entá cuando se presenta baxo la escusa d’una supuesta cultura o patrimoniu que, según el colectivu, resulten ayenos a la realidá asturiana. Pa la organización, la tauromaquia representa la imposición d’unos vezos españoles que nun se correspuenden cola tradición asturiana.

La concentración d’esti xueves nes Lletrones quier ser, poro, un actu simbólicu y revindicativu pa reafitar el carácter antitaurín de Xixón y caltener viva una movilización que, añu tres añu, sigue reclamando la fin definitiva de les corríes de toros.

This work is licensed under a Creative Commons Attribution 4.0 International License.