El Conceyu d’Illas paez dimpuestu a lo que faiga falta con tal que que nun se faigan públicos unos documentos que podríen incriminalos nun casu d’irregularidaes, cuando non de prevaricación, según denuncia del vecín que lleva años solicitando esa información y que tamién denuncia persecución personal que “ta traduciéndose en torgues nos permisos y en cuasi tolo rellacionao cola tramitación d’obres y otres xestiones municipales”

Carta remitía pol Conseyu Tresparencia

Dos años de solicitudes, cuatro peticiones formales, dos refugues por usar l’asturianu, una resolución del Conseyu de Tresparencia y Bon Gobiernu ensin cumplir y, agora, un contenciosu alministrativu del Conceyu d’Illas contra’l propiu Conseyu. L’Ayuntamientu ta usando toles víes posibles pa dilatar l’accesu a una documentación pública que yá-y foi requirida por un organismu estatal.

La entruga que queda enriba la mesa ye inevitable: ¿qué contienen los documentos del depósitu d’El Coguyón pa que l’Ayuntamientu d’Illas prefiera enfrentase al Conseyu de Tresparencia énte l’Audiencia Nacional antes que facelos públicos?

Pa l’afectáu, el vecín que solicita la información, esti movimientu tien una llectura clara: retrasar el procedimientu hasta depués de les elecciones y evitar que se pueda conocer enantes qué asocedió realmente cola tramitación del depósitu d’El Coguyón.

Esa ye la situación que denuncia un vecín d’Illas tres intentar acceder al espediente municipal rellacionáu col depósitu d’El Coguyón, una documentación que, según caltién, podría aclarar posibles irregularidaes na xestión d’una espropiación venceyada a esa infraestructura.

La negativa reiterada del Conceyu d’Illas a facilitar la información solicitada, que despierta sospeches dende un entamu, da agora un pasu más: l’Ayuntamientu enfréntase al propiu Conseyu de Tresparencia nun recursu contenciosu-alministrativu énte l’Audiencia Nacional. Too ello, según interpreta’l vecín afectáu, col oxetivu de retrasar l’asuntu hasta dempués de les elecciones y evitar que se conozan los documentos antes d’esi momentu.

La voluntá d’ocultación llega hasta’l puntu de que’l Conceyu d’Illas, en cuenta d’apurrir una información que-y foi reclamada por un organismu estatal, opta por abrir una vía xudicial contra esi mesmu organismu.

La hestoria vien de lloñe. El casu arrinca’l 3 de xunu de 2024, cuando’l vecín solicita per primer vegada l’accesu al espediente municipal al sospechar una posible actuación irregular, o inclusive un presuntu casu de prevaricación, rellacionáu con una espropiación de terrenos venceyada al depósitu d’agua. Según denuncia, nun recibió nenguna rempuesta per parte del Conceyu d’Illas.

Tres meses dempués, el 9 de xunetu de 2024, torna presentar la mesma solicitú. Nesta ocasión sí recibe contestación, anque negativa. El Conceyu refuga facilitar la documentación argumentando que la petición taba redactada n’asturianu. El vecín considera esta decisión una vulneración de los sos derechos llingüísticos y una muestra más de les torgues que, según afirma, vien sufriendo na so rellación col Ayuntamientu.

Ante esta situación, en febreru de 2025 presenta una reclamación énte’l Conseyu de Tresparencia y Bon Gobiernu. Sicasí, l’organismu desestima la reclamación al considerar escesivu’l tiempu trescurríu dende la negativa municipal hasta la presentación del recursu.

L’afectáu decide entós volver entamar el procesu. El 9 de xunu de 2025 presenta una nueva solicitú d’accesu énte l’Ayuntamientu d’Illas. El 8 de xunetu de 2025, según la versión del vecín, el Conceyu torna negar l’accesu, otra vuelta col argumentu de que la petición taba presentada n’asturianu.

El 19 d’agostu de 2025, el vecín vuelve presentar una reclamación énte’l Conseyu de Tresparencia. Nesta ocasión, la reclamación termina con una resolución favorable: el 30 de marzu de 2026, l’organismu estima la solicitú y concede l’accesu a la información pública reclamada.

La resolución del Conseyu de Tresparencia da la razón al vecín y ordena al Conceyu d’Illas facilitar la documentación solicitada. Sicasí, según denuncia l’afectáu, l’Ayuntamientu nun apurre la información del depósitu d’El Coguyón nin cumple la resolución dientro del plazu afitáu.

Tres superar esi plazu ensin recibir la documentación, el vecín presenta nueves peticiones el 29 d’abril y el 1 de xunu de 2026. Tamién reclama de nuevu l’accesu a la información énte l’Ayuntamientu d’Illas el 30 d’abril de 2026, petición que, según esplica, vuelve ser refugada’l 18 de mayu de 2026 por tar redactada n’asturianu.

El 16 de xunu de 2026 llega un nuevu capítulu. Enantes de recibir la información reclamada sobre’l depósitu d’El Coguyón, el vecín recibe una comunicación del Conseyu de Tresparencia na que se-y informa de que l’Ayuntamientu d’Illas va presentar un recursu contenciosu-alministrativu énte l’Audiencia Nacional contra la resolución que-y obligaba a facilitar l’espediente.

El vecín enmarca esta situación nun conflictu más ampliu cola institución municipal. Denuncia que ta siendo perseguíu por tar en controversia cola familia d’un conceyal del Ayuntamientu, responsable del área d’obres, y por tener presentao delles denuncies énte la Fiscalía contra l’alcalde, Fernando Alberto Tirador, y contra’l secretariu municipal, Juan Manuel Acebal, por distintos asuntos. Según afirma, esti conflictu ta traduciéndose en torgues nos permisos y en cuasi tolo rellacionao cola tramitación d’obres y otres xestiones municipales.

Sicasí, lo que se reclama nun ye una información privada nin un favor personal. Ye l’accesu a un espediente municipal sobre una actuación pública, reconocíu como derechu pol Conseyu de Tresparencia. Por eso, el fondu del casu va más allá d’un conflictu individual: afecta al derechu de la ciudadanía a fiscalizar la xestión municipal, al cumplimientu de les resoluciones de los organismos públicos y al respetu a los derechos llingüísticos de quienes se dirixen a l’alministración n’asturianu.

Agora, la cuestión queda pendiente de la vía xudicial. Pero’l retrasu yá tien efectos políticos evidentes: la documentación sobre’l depósitu d’El Coguyón, que’l vecín reclama dende 2024, sigue ensin entregase, y esti nuevu retrasu permite que l’asuntu quede tapáu hasta dempués de les elecciones.

This work is licensed under a Creative Commons Attribution 4.0 International License.