«Ye dicir, el bable, que’l so conocimientu y usu per parte de l’alministración concernida consten acreditaos ante esti Conseyu… nun puede ser invocáu como causa impeditiva de la tramitación d’una solicitú d’información»

Panera sobre la que se pidi información

El Conseyu de Tresparencia da la razón a Horru On Line nel so derechu a presentar solicitudes n’asturianu ante l’Ayuntamientu d’Illas ya insta al consistoriu a facilitar la información requerida nun plazu máximu de venti díes hábiles.

La polémica entamó tres una solicitú d’información presentada pol colectivu sobre la situación de les obres de rehabilitación d’una panera en Ridón, Taborneda, conceyu d’Illas. Horru On Line denunciara va más d’un añu l’estáu d’esbarrumbe del inmueble y solicitara información sobre les actuaciones realizaes. Según recueye la resolución, trátase d’una cuestión que «tien la naturaleza d’información pública» y reviste «un evidente interés públicu».

L’Ayuntamientu d’Illas refugó en tres ocasiones l’escritu por tar redactáu n’asturianu. Per otra parte, el Serviciu de Conservación del Patrimoniu, informáu del casu, negó tamién l’accesu al espediente correspondiente.

Tres la presentación d’una pidición d’accesu a la información pública ante’l Conseyu de Tresparencia nel mes d’ochobre, l’organismu abrió espediente un mes dempués. Nel marcu d’esi procedimientu, l’Ayuntamientu d’Illas presentó les sos alegaciones.

Agora, el Conseyu vien de resolver l’asuntu nos términos citaos, dexando claro que les alministraciones tienen la obligación d’aceutar escritos redactaos n’asturianu. La resolución recuerda que’l propiu conceyu demostró n’ocasiones anteriores la so comprensión de la llingua y señala que la non oficialidá, argumentu esgrimíu pol consistoriu, nun puede xustificar el refugu de la solicitú, al tar amparáu esti derechu pola Llei d’Usu y Promoción del Asturianu y pol Estatutu d’Autonomía.

Amás, el Conseyu alude al Conveniu del Conseyu d’Europa sobre l’accesu a los documentos públicos, qu’afita que los requisitos formales pa exercer esti derechu tienen de llendase a los estrictamente necesarios pa tramitar la solicitú. Nesti casu, considera qu’esiste plena capacidá pa comprender el conteníu del escritu y que, poro, nun hai nenguna torga que xustifique la so non tramitación.

La importancia d’esta resolución reside en qu’invalida direutamente toles refugues previes d’escritos n’asturianu qu’esti y otros conceyos vienen presentando alegando que la Llei d’Usu “algama namás a l’alministración del Principado y non a les llocales”. 

This work is licensed under a Creative Commons Attribution 4.0 International License.