SUATEA manifestó’l so esmolecimientu pola situación de los miembros de los tribunales d’oposiciones y de les persones opositores, y reclamó a la Conseyería d’Educación una serie de meyores que considera urxentes pa dambos colectivos.

No tocante a los miembros de tribunal, el sindicatu destaca cuatro revindicaciones principales. La primera fai referencia a los retrasos nos pagos, polo que considera imprescindible modificar la normativa pa que los servicios prestaos puedan cobrase na siguiente nómina y non dempués de dellos meses d’espera.

La segunda revindicación tien que ver coles cuantíes percibíes polos integrantes de los tribunales. SUATEA denuncia que, tres años de perda de poder adquisitivu acumulada, siguen cobrando les mesmes cantidaes qu’en 2009.

Amás, el sindicatu reclama que vocalíes, secretaríes y presidencies perciban compensaciones adicionales cuando realicen hores estra, tanto en xornaes que superen les ocho hores como nos fines de selmana. Tamién solicita que l’alministración dea a les presidencies instrucciones clares que garanticen xornaes de trabayu razonables y con descansos abondos.

Pela so parte, les demandes rellacionaes coles oposiciones inclúin la publicación de los criterios d’evaluación, como mínimu, dende’l momentu en que se publique la convocatoria del procesu nel BOPA, cola fin de facilitar una preparación afayadiza de les pruebes.

SUATEA tamién considera urxente anovar el repositoriu d’esámenes, que califica de desactualizáu, pa incluyir tolos exercicios de toles especialidades y de tolos cuerpos docentes, siguiendo l’exemplu d’otres comunidaes autónomes.

Otra de les reclamaciones ye la espublización d’un baremu provisional con tiempu abondu pa presentar alegaciones. El sindicatu entiende que les y los opositores nun deberíen tar obligaos a reclamar la mesma selmana na que se xueguen el so futuru profesional.

Finalmente, SUATEA volvió reclamar un nuevu Alcuerdu de Profesoráu Interín. Según la organización, l’alcuerdu vixente, robláu en 2014, ye responsable de situaciones como la obligatoriedá de presentase presencialmente’l día de la primera prueba escrita. Amás, recuerda que namái foi suscritu por dos organizaciones sindicales, polo que, a xuiciu del sindicatu, nun cuenta col respaldu de la mayoría sindical.

This work is licensed under a Creative Commons Attribution 4.0 International License.