El coleutivu de sofitu a Les Seis de La Suiza considera que la llucha nun acaba cola lliberación de les sindicalistes condenaes. Dende’l grupu recuerden que la represión sindical sigue presente y que la organización y la solidaridá continúen siendo ferramientes imprescindibles pa facer-y frente.

Programa de la xornada

Baxo’l llema «La llucha nun acaba equí», el coleutivu convocó una xornada antirrepresiva que se va cellebráse’l próximu 21 de xunu nel Polideportivu Cimavilla de Xixón. L’actividá va cuntar con intervenciones, actuaciones musicales, espacios d’alderique y una mesa reonda dedicada a dellos de los casos más significativos de represión venceyaos a conflictos llaborales y sociales de los caberos años.

«Tuvimos nes cais antes y vamos siguir dempués», señalen dende la organización, qu’apuesta por caltener viva la movilización más allá del desenllaz del casu de Les Seis de La Suiza.

Un de los actos centrales de la xornada va ser la mesa reonda antirrepresión prevista pa les 17.00 hores, na que van participar Jesús Galván y Manolo Balber, del conflictu del Metal de Cádiz; José Antonio Valencia, d’ATA Acerinox d’Alxecires; Natalia Lago, de Los 7 de Somosaguas; y Javitxu Aijón, de Los 6 de Zaragoza.

Dende la organización destaquen que se trata de «cuatro casos de represión ente los munchos que vivimos nel Estáu estos últimos años», una oportunidá pa compartir esperiencies y reflexonar sobre la solidaridá, la resistencia y la organización colectiva frente a los procesos represivos.

La programación va entamar al mediudía y va incluyir tamién intervenciones de persones solidaries col casu de La Suiza, representantes d’organizaciones sindicales, actuaciones musicales y actividaes culturales a lo llargo de tol día.

This work is licensed under a Creative Commons Attribution 4.0 International License.