Cuando una ciudá recibe un buque de guerra como quien recibe una feria gastronómica o un festival cultural, produzse un procesu de blanquiamientu simbólicu. La inversión militar dexa de percibise como una decisión política discutible y pasa a presentase como daqué natural, inevitable ya incluso prestoso.

Patrulleru Arnomendi

Mañana llega a Xixón el patrulleru d’altura Arnomendi; primero atracó n’Avilés, onde recibió les primeres visites. La noticia llega al traviés de la prensa como si se tratare de la visita d’una gran atraición turística: horarios de visita, xornaes de puertes abiertes y la posibilidá de xubir a bordu d’una embarcación militar de la Armada española. Una “actividá familiar” más dientro de la programación d’arruelu de la ciudá. Una actividá más de blanquiamientu del gastu armamentísticu, del militarismu y del españolismu.

¿Dende cuándo los instrumentos militares pasaron a convertise n’atracciones turístiques? ¿En qué momentu asumimos como daqué normal, entreteníu ya incluso educativu visitar un buque de guerra como quien visita un muséu, una esposición o una representación teatral?

Los barcos de guerra nun son centros culturales, nin espacios artísticos, nin proyectos científicos. Son ferramientes d’una estructura militar. Lo mesmo que les exhibiciones militares nun son actividaes pala reciella nin los vuelos d’aviones de combate son espectáculos, o, polo menos, nun tendríen de selo.

La normalización de la presencia militar nos espacios públicos forma parte d’una estratexa bien conocida. Esposiciones d’armamentu, desfiles, exhibiciones aérees, visites a cuarteles o buques y actividaes orientaes a la reciella busquen presentar les fuercies armaes como una institución cercana, moderna y atractiva. L’oxetivu nun ye amosar un equipu nin dar a conocer una “profesión”; ye construyir una determinada imaxe social de la militarización y reforciar un determináu sentimientu patrióticu. Porque sí, anque paez absurdo tener que recordalo, la maquinaria de guerra fabrícase, mercase y caltiénse con una finalidá bien concreta: exercer la violencia organizada, en concreto, facer la guerra.

Que se llegue a considerar normal tener maquinaria de guerra na ciudá, entretener a la población con armes o facer cola pa visitar un patrulleru militar da una idega bastante clara de hasta qué puntu se normalizó la militarización del espaciu públicu. Y tamién de lo enferma que ta una sociedá que convierte en espectáculu aquello que, na so esencia, foi diseñáu pa la guerra.

This work is licensed under a Creative Commons Attribution 4.0 International License.