La costrucción de 28 chalés na mesma oriella de la playa La Isla, en Colunga, vuelve poner de manifiestu la presión urbanística que sigue sufriendo’l llitoral asturianu. El proyectu pretende desendolcase na zona del Barrigón, nuna parcela de 20.398 metros cuadraos allugada xunto a la mar, al traviés d’una modificación puntual a costafecha de les Normes Subsidiaries de Planeamientu
Fastera na que ta planificada la urbanización
La propuesta contempla la construcción de 28 viviendes unifamiliares nuna finca que llinda cola costa, una actuación que resulta difícil d’entender dende la perspectiva de la protección ambiental y territorial. La distancia de protección prevista ye de malpenes una franxa de 20 metros respeuto de la sablera, bien alloñada de los 500 metros que recueye’l Plan d’Ordenación del Llitoral Asturianu (POLA) pa suelos rústicos allugaos fora de zones urbanes, precisamente cola finalidá de preservar la costa frente a agresiones urbanístiques d’esti tipu.
Esti casu constitúi un exemplu más del riesgu que corre’l llitoral asturianu pola creciente presión costructiva. La urbanización prevista en La Isla abre la puerta a nueves actuaciones asemeyaes n’otres árees costiegues d’Asturies, favoreciendo la ocupación progresiva de los entornos llitorales más sensibles cola permisividá de l’Alministración autonómica.
Dende va décades vien denunciándose la presión urbanística que carez la costa asturiana, especialmente nes comarques central y oriental. La crisis inmobiliaria supunxo una cierta paralización d’estos procesos, pero nos últimos años vuelven apaecer dinámiques de masificación y especulación inmobiliaria en espacios d’eleváu valor natural y paisaxísticu, como ye’l casu de La Isla.
Los 28 chalés previstos van xenerar una evidente pantalla arquitectónica vista dende la playa. Anguañu, estos terrenos tán ocupaos por praos ensin edificaciones, polo que la construcción supondría una alteración bultable del paisaxe costiegu y una acumulación de volúmenes edificatorios hasta agora inexistente na zona.
Amás, estes viviendes van provocar una mayor presión sobre la servidume de tránsitu establecida pola normativa de costes, un derechu públicu que tien de garantizase. La creación de nuevos accesos venceyaos a propiedaes privaes pue acabar condicionando l’usu y disfrute d’un espaciu que pertenez a tola ciudadanía.
Tampoco queda garantizáu l’accesu públicu al mar nel sector oriental de la playa de La Isla, cuestión especialmente relevante nuna zona de gran interés social y recreativu.
A estes afecciones hai qu’amiestar los problemes d’abastecimientu d’agua potable y saneamientu que yá presenta la zona. Los vecinos vienen careciendo dende hai años episodios de vertíos d’agües residuales mientres la temporada braniega, causaes pola saturación turística, asina como dificultaes nel suministru d’agua potable, problemes que previsiblemente podrían agravase cola incorporación de nueves viviendes.
Dende la Coordinadora Ecoloxista d’Asturies ya presentaron alegaciones a esti proyectu y anunciaron que van siguir trabayando pa evitar esti tipu de pelotazos urbanísticos que ponen en riesgu los valores naturales, paisaxísticos y sociales del llitoral asturianu, defendiendo un modelu de desarrollu compatible cola conservación d’un patrimoniu natural que pertenez a tola sociedá.
This work is licensed under a Creative Commons Attribution 4.0 International License.
