La escritora peruana María José Caro va realizar un diálogu lliterariu xunto con Lula Montes, escritora mexicana residente en Xixón, y va ser presentada por Diego Solís el sábadu 13 de xunu de 2026 a les 12:30 hores na Asociación Vecinal Evaristo San Miguel, nel barriu d’El Polígonu de Xixón.

María José Caro (Lima, 1985) ye escritora y comunicadora social. Estudió na Universidá de Lima y cursó estudios de posgráu na Universidá Complutense de Madrid. Ye autora de los llibros de rellatos La primaria y ¿Qué tengo de malo?, amás de les noveles Perro de ojos negros y Vida animal. En 2017 foi escoyida pa formar parte de Bogotá39, la prestixosa escoyeta que reconoz a les escritores y escritores menores de 40 años más destacaos d’América Llatina.

La so llegada forma parte del programa de la Residencia Lliteraria Xixón, una iniciativa que dende va dellos años convierte la ciudá nun espaciu d’acoyida y creación pa autores de distintos países y llingües. El proyectu permite que les escritores residentes desarrollen obres nueves mientres la so estancia n’Asturies y entren en contautu col públicu al traviés d’alcuentros, llectures y actividaes culturales.

La Residencia Lliteraria Xixón vien recibiendo de manera regular a autores internacionales y del Estáu español, convirtiéndose nun espaciu d’intercambiu cultural y lliterariu. Nel casu de María José Caro, la organización destacó que llega a Xixón con un nuevu proyectu creativu ente manos, que va desenvolver mientres la so estancia na ciudá.

L’alcuentru del sábadu va permitir conocer de cerca la trayeutoria de la autora peruana y el so procesu creativu, amás de compartir impresiones sobre la creación lliteraria contemporánea nun diálogu abiertu col públicu.

This work is licensed under a Creative Commons Attribution 4.0 International License.