Asturies volvió celebrar ayeri’l Día Mundial de la Sidra, una fecha que gana relevancia dende que la Cultura Sidrera Asturiana fuera reconocida pola UNESCO como Patrimoniu Cultural Inmaterial de la Humanidá. La conmemoración llegó a la so segunda edición tres la declaración internacional y desendolcóse con una amplia programación cultural, divulgativa, folixera y gastronómica repartida per distintos puntos del país.
Actu en La Llaboral
Más de venti actividaes ente les que destacaron proyecciones audiovisuales, talleres, esposiciones, alcuentros culturales y actos institucionales, con celebraciones en conceyos como Xixón, Uviéu, Nava, Siero, Colunga, Ribadesella o Teberga. La programación incluyó tamién una acción promocional en Madrid pa reforzar la proyección internacional de la Cultura sidrera asturiana.
Ún de los actos más simbólicos foi l’aconceyamientu de cientos de persones pa echar un culín simultaneu, celebráu a les 12 del mediudía na plaza de la Catedral d’Uviéu, onde escanciadores y aficionados brindaron de manera coordinada pa reivindicar una tradición que forma parte de la identidá cultural asturiana.
La celebración tuvo tamién una importante vertiente cultural. Nel Paraninfo de Llaboral Ciudá de la Cultura programóse la proyección de material audiovisual recuperáu sobre la ellaboración de la sidra nos años venti del sieglu pasáu, acompañáu por música en direuto creada pa la ocasión y interpretada pol conxuntu Forma Antiqva. La xornada remató con un brindis institucional con sidra asturiana.
Nava tampoco faltó a la cita. A les doce del mediudía tuvo llugar nos esteriores del Muséu de la Sidra un actu simbólicu d’escanciáu d’un culín organizáu pola Fundación de la Sidra, la DOP Sidra d’Asturies y la Federación Asturiana de Conceyos. El xestu sirvió pa reivindicar el papel de Nava como unu de los grandes referentes de la cultura sidrera y pa poner en valor una tradición que forma parte de la identidá asturiana.
La hostelería sumóse igualmente a la efeméride al traviés de les V Xornaes Gastronómiques del Día Mundial de la Sidra, con decenes d’establecimientos ufiertando platos, tapes y ellaboraciones especiales onde la sidra foi protagonista. Namái n’Uviéu participaron 33 establecimientos dientro d’una iniciativa impulsada por OTEA.
La xornada tuvo tamién un importante componente de futuru col actu institucional d’inauguración del nuevu llagar de Campoastur en San Xuan de Capistrano, na parroquia de Tiñana (Siero). Les nueves instalaciones abrieron oficialmente les sos puertes coincidiendo col Día Mundial de la Sidra, nun actu que incluyó una visita al llagar y a la pomarada y que remató con una espicha nes mesmes instalaciones. La inauguración supón un nuevu impulsu pa la producción de mazana y sidra asturiana y amuesa’l dinamismu qu’entá caltién un sector que combina tradición y innovación.
El Día Mundial de la Sidra, que se celebra cada 3 de xunu, busca poner en valor una tradición que tresciende la propia bébora y qu’engloba’l cultivu de la mazana, la ellaboración, l’escanciáu, la gastronomía, la música y la sociabilidá venceyaes a la cultura sidrera. La gran participación rexistrada nes actividaes d’esti añu confirma’l bon momentu que vive un patrimoniu que, tres el reconocimientu de la UNESCO, cuenta agora con una proyección internacional ensin precedentes.
This work is licensed under a Creative Commons Attribution 4.0 International License.
