La reacción xeneralizada de los asturianos al enterase del impuestu al turismu ye positiva. Trátase d’una demanda llargamente reclamada por una parte importante de la población dende que, nos años noventa, Andecha Astur aniciara —con notable visión de futuru— la campaña «Asturies nun ta en venta», na que yá se reclamaba esta midida.

La propuesta d’Andecha Astur concretárase na Llei de Turismu Caltenible presentada pola organización nel añu 2020, que recoyía la regulación d’un impuestu sobre’l turismu caltenible, o ecotasa, aplicáu a les persones residentes n’agospios turísticos, col oxetivu de cubrir los gastos públicos que xenera l’actividá d’esti sector. «Los fondos recaldaos por esti mediu diríen destinaos al mesmu llugar onde se xeneren y, con ellos, amás de cubrir gastos estra, podríense poner en marcha proyeutos d’interés llocal, como la recuperación y revalorización d’espacios emblemáticos, la diversificación del modelu económicu, la recuperanza del paisaxe agrariu, proyeutos de formación, I+D+i o de transición enerxética», especificaba la propuesta.

Seis años depués, tres l’aprobación de la ecotasa, los comentarios en redes sociales nun dexen llugar a duldes. Dellos usuarios feliciten la llegada d’un ingresu estra pa los conceyos más afeutaos pola presión turística y recuerden qu’esta ye una midida que lleva años funcionando en munchos destinos europeos. Otros amuesen la so satisfacción porque, quiciabes, pueda sirvir pa poner dalgún llende al turismu desaforáu o, cuando menos, pa abrir el debate sobre la necesidá de recuperar sectores económicos que xeneren menos precariedá llaboral y menor impactu ambiental.

«El favor que mos facéis a los asturianos nun viniendo ye impagable. Yá nos sobra tantu turismu. Asturies tien una tradición industrial que permitió a la so población tener trabayos de calidá y bien pagaos. El cambiu de modelu hacia’l turismu ye insufrible: trabayos de mierda, temporales y mal pagaos, y enriba superpoblación tol branu», retrucaba en redes sociales Silvia Huerres a un potencial turista que «amenaciaba» con nun visitar Asturies.

Tamién son abondos los comentarios que coinciden en que tres euros de diferencia nos precios que se tán pagando poles estancies vacacionales ye una cantidá insignificante que difícilmente va facer que naide se replantee venir a Asturies. Comentarios como «¿Namái eso?», «Teníen que pagar diez» o «Paezme poquísimo» repítense con frecuencia.

Sicasí, perbaxo de toes estes felicitaciones apaez un segundu alderique: la xestión d’esti pagu turísticu. La propuesta anicial presentada nel so día por Andecha Astur reclamaba que los fondos recaldaos revirtieren direutamente nes poblaciones afeutaes, destinándose a los servicios públicos, les infraestructures y el curiáu del mediu ambiente. Sicasí, esti estremu entá nun quedó esclariáu.

«Si lo que paguen va pal beneficiu xeneral, sí. Si va pal bolsu de los políticos de turnu, meyor que non», comenta Luis Fragoso nel so perfil de Facebook.

This work is licensed under a Creative Commons Attribution 4.0 International License.