L’abandonu y desaniciu del padremuñu asturianu nun ye casual, ye una amuesa más del fondu desinterés, cuando non asturfobia direuta que guia la xestión d’Asturies a la contra de cualisquier seña d’identidá asturiana

Carta remitida a Horru Online

L’Ayuntamientu Castrillón vien de reconocer l’aniciu de los procedimientos pa declarar en ruina una panera catalogada de Samartín de L’Aspra, depués de más de dos años de reclamaciones y escritos presentaos por Horru Online. La primer denuncia pública sobre’l so estáu realizárase’l 26 d’abril de 2024, alertando del deterioru progresivu d’una construcción tradicional considerada parte del padremuñu históricu asturianu.

El conceyu emitió finalmente una rempuesta tres diversos escritos presentaos pola asociación y dempués de que fuera necesario recurrir al Conseyu de Transparencia pa obtener información sobre la situación del espediente. Na contestación municipal recuéyese que s’anicien los trámites pa declarar la ruina del inmueble.

La construcción afectada ye una panera datada ente los sieglos XVIII y XIX. El so valor patrimonial yá figuraba reconocíu oficialmente nel BOPA del 26 de setiembre de 2008, onde apaecía catalogada con nivel de proteición “integral”. Nel mesmu documentu yá se señalaba entós la necesidá d’actuaciones d’igua y caltenimientu pa garantizar la so conservación, midíes que  nunca llegaron a executase.

La situación agravóse col pasu de los años. En 2021, la Conseyería de Cultura autorizó’l desmontaxe de la panera col oxetivu d’iguala y restituyila al so estáu orixinal. Sicasí, les actuaciones previstes nun se materializaron y el deterioru continuó avanzando hasta llegar a la situación actual.

Dende Horru Online tán estudiando la posibilidá de presentar una denuncia xudicial contra los responsables de la situación, considerando que’l procesu evidencia una falta grave de protección sobre’l padremuñu tradicional asturianu.

El casu de Samartín de L’Aspra vuelve poner enriba la mesa’l problema del abandonu del padremuñu etnográficu n’Asturies. Construcciones tradicionales protexíes oficialmente acaben en munchos casos nun procesu continuu de degradación ensin que les alministraciones responsables actúen a tiempu. La perda d’horros, paneres y otros elementos históricos repítese dende hai años per tol país, ensin una política efectiva de conservación nin controles reales sobre’l cumplimientu de les midíes de protección. Pa munchos colectivos de defensa patrimonial, esti desaniciu progresivu nun responde a casos aisllaos, sinón a un desinterés estructural -cuando non mala intención- pola conservación de les señes d’identidá asturianes. 

This work is licensed under a Creative Commons Attribution 4.0 International License.