La retirada por parte’l Conceyu de Ribeseya de la placa orixinal del conxuntu escultóricu dedicáu a les Sardineres pa sustituyila por una nueva versión namái en castellán ye, a cencielles, un ataque intencionáu a la llingua asturiana y a la tradición riosellana . La nueva placa, amás, elimina tamién l’escudu d’Asturies que figuraba nel diseñu anterior.
Anterior placa, n’asturianu
La decisión supón la desapaición del asturianu d’un espaciu públicu venceyáu directamente cola memoria popular y mariñana de la villa. La escultura fai homenaxe a les sardineres, un colectivu históricamente venceyáu al trabayu del mar y a una comunidá onde la llingua asturiana formaba parte de la vida cotidiana, tanto nel llabor diariu como nel vocabulariu vinculáu a la pesca y a los pexes.
La placa retirada reconocía esa memoria n’asturianu ensin que l’usu de la llingua xenerara nengún tipu de conflictu o problemática dende la so instalación. Sicasí, el gobiernu municipal del Partíu Popular decidió suprimir esa presencia del idioma propiu d’Asturies y reemplazala por un testu esclusivamente en castellán.
Dende Iniciativa pol Asturianu calificaron la actuación como “un pasu atrás na visibilización y usu del idioma” y criticaron que se gasten recursos públicos en retirar la llingua asturiana d’un monumentu que, amás, tien el nome de “Sardineres” n’asturianu.
La organización considera que la decisión supón una falta de respetu escontra la historia cultural y llingüística de Ribeseya y reclama al Partíu Popular d’Asturies una aclaración sobre la so postura respeuto al patrimoniu llingüísticu. Tamién recuerda que esti tipu d’actuaciones contradicen el discursu habitual del partíu sobre la Llei d’Usu y la protección del asturianu.
El casu volvió abrir l’alderique sobre la presencia de la llingua asturiana nos espacios públicos y sobre les decisiones municipales que afecten a elementos patrimoniales y simbólicos venceyaos a la identidá cultural asturiana.
This work is licensed under a Creative Commons Attribution 4.0 International License.
