Andecha Astur aprovechó la conmemoración del 25 de Mayu pa revindicar la soberanía histórica d’Asturies y facer un llamáu a la xunidá de les fuercies soberanistes, asturianes de izquierdes y asturianistes.

Ufrienda floral

El colectivu celebró esti domingu l’actu d’“Homenaxe a la Declaración de Soberanía” delantre la Sala Capitular onde, nel añu 1808, la Xunta Suprema reconoció la soberanía del pueblu asturianu frente a les inxerencies foriates. Nel actu, que remató con una ufrienda floral, defendióse la necesidá de construyir alternatives polítiques propies “dende y pa Asturies”.

La encargada de lleer la comunicación foi Llucía Fernández Marqués, qu’apostó por que “el soberanismu, la izquierda asturiana y l’asturianismu” dexen “de mirar pa Madrid” y de depender de proyectos estatalistes.

“El soberanismu, la izquierda asturiana, l’asturianismu… tien que dexar d’apostar por proyectos estatalistes y ser consecuentes: trabayar como asturianes y asturianos por Asturies, con propuestes y alternatives propies, non como una sucursal obediente a les decisiones de Madrid”, señaló.

Fernández Marqués destacó amás la necesidá d’articular una alternativa “viable y creyible” pa la sociedá asturiana, anque reconoció la pluralidá ideolóxica y d’enfoques qu’esiste dientro’l soberanismu.

“Sabemos que dientro’l soberanismu somos un grupu heteroxeniu, qu’hai formes diferentes de ver les coses, d’analizales y de da-yos rempuesta, pero agora mesmo hai una necesidá urxente d’ufrir a la sociedá asturiana una alternativa viable, creyible, con posibilidaes reales de representalos”, afirmó.

La intervención remató con un llamáu a trabayar “xuntos” dende’l respetu a les diferentes sensibilidaes y ideoloxíes, col oxetivu d’articular “una rempuesta común” dende la condición d’asturianes y asturianos.