Asturies va convertise nel centru européu de defensa de les llingües minorizaes cola celebración del XXVIII Congrèsu de l’Asociación pa les Llingües y Cultures Europees Menaciaes  qu’aconceyará n’Uviéu del 24 al 26 de xunetu de 2026.

El Muséu Arqueolóxicu d’Asturies va acoyer esti importante alcuentru internacional baxo’l llema “En avant pour nos langues!”, reuniendo representantes y especialistas de distintos pueblos y naciones d’Europa comprometíos cola supervivencia y normalización de les sos llingües propies.

La celebración del congresu supón un reconocimientu internacional a la llucha pola dignificación de la llingua asturiana y al papel d’Asturies dientro de los movimientos europeos de defensa de la diversidá cultural y llingüística. Nun ye la primer vegada qu’Asturies acueye esti congresu: yá lo fixera en 1987, nuna edición histórica presidida pol antropólogu y escritor bretón Robert Gessain, ún de los impulsores de la cooperación ente pueblos ensin Estáu y cultures amenaciaes d’Europa.

L’actual edición va cuntar con una importante presencia asturiana, tantu institucional como académica y cultural. La sesión inaugural va celebrase na Xunta Xeneral y va incluyir una intervención sobre la diversidá llingüística y cultural de la Europa de los Alpes al Adriáticu, amás d’una conferencia sobre’l papel de la lliteratura nes llingües amenaciaes.

L’escritor y académicu Xuan Bello va participar nun diálogu lliterariu sobre creación y compromisu cultural, mientres que’l profesor y escritor Inaciu Galán va presentar la comunicación “Presente y futuru del asturianu”. Tamién va participar la investigadora y escritora Llucía Fernández, cola intervención “Andrés Solar, pallabra y país”, pente otres participaciones asturianes.

Amás, van intervenir representantes d’otres llingües menaciaes del continente, como’l bretón, l’occitanu, el corsu, el galés, l’aragonés o’l friulanu, nuna programación qu’analizará la situación actual d’estes llingües, los desafíos de la tresmisión xeneracional y el papel de la creación lliteraria na so supervivencia. El congresu va dedicar un espaciu especial al alderique “La creación lliteraria contemporánea nes llingües amenaciaes: ¿Por qué? ¿Cómo?”, que da tamién subtítulu a esta edición.

La elección d’Asturies como sede d’esti congresu internacional produzse nun momentu decisivu pa la llingua asturiana. La revindicación de los drechos llingüísticos y culturales sigue siendo una cuestión central, nuna Europa onde la diversidá cultural s’enfrenta a procesos crecientes d’uniformización y perda de falantes.

La presencia d’Asturies nel vuelve asina poner de manifiestu que la defensa del asturianu nun ye una cuestión llocal, sinón parte d’una llucha europea pola pluralidá cultural, la democracia llingüística y el derechu de los pueblos a vivir y crear na so propia llingua.

This work is licensed under a Creative Commons Attribution 4.0 International License.