Llucía F. Marqués

El peculiar diseñu del cartelu anunciador del Martes de Campu ta dando muncho que falar; pero nun ye un casu aislláu, l’usu indiscriminau de la Intelixencia Artificial ta faciendo munchu mal y trestocando la imaxinería popular sidrera

“Botella sidre”. Atención a la chapa.

L’usu de la IA na ellaboración de cartelería y diseños ye constante nel caberu añu, siendo bien reconocible l’estilu que repite esta ferramienta —porque d’eso trata la IA, de repetir y reinterpretar— a la d’ilustrar cualquier cartelu.

Pero la IA nun sabe de sidre. Igual de cider, un pocu; de cerveza, un muncho. Y lo d’Asturies —anque seique escriba un asturianu más qu’aceptable— tampoco lo tien mui claro. Poro, vemos cada poco cartelos llamentables anunciando eventos sidreros con vasos enllenos hasta l’esmucir, echadores machacando la sidre como si tuvieren apagando un incendiu y otres llaceries visuales que manquen la vista de cualquier asturianu con un mínimu d’amor propiu.

Pero lo del cartelu del Martes de Campu n’Uviéu supera yá tolo visto hasta agora. Sidre nuna botella de cerveza, horros gallegos, traxes que si son del país sedrán d’otru, porque d’esti non, y gaiteros que, amás de venir de Galicia, toquen al tiempu gaita y tambor, como si tuvieren cuatro brazos. Arredondiando’l cuadru, el testu: “Bollos preñados”. Asina, con d, a dolor.

A ver, entendámonos: la IA nun tien por qué saber de sidre asturiana. Eso depende de la información que-y vaiga metiendo la xente, sabemos qu’Asturies ye un país pequeñu y que nun vamos competir en datos con Milwaukee. Pero’l problema nun ye la máquina. El problema ye’l paisanu que ve esi cartelu, diz “perfecto” y manda imprentarlo ensin que-y tiemble’l pulsu nin se-y atragante’l café -sidre nun creo que tome-.

Les redes sociales, como ye lóxico, nun apararon d’echar fumu dende que’l cartelu salió a la lluz. Dellos comentarios yá son historia del humor asturianu contemporaneu: “gaiteros polivalentes”, “Típica botella sidra a puntu esplotar, igual ye mensaxe subliminal”, “Dende llueu del molde Xixón nun ye… eso ta soplao por Canteli y la verdulera de Vox”, o’l memorable “A los ricos bollitos encintos”.

Y lo peor ye que la IA, probablemente, agora mesmu crea que los asturianos escanciamos cerveza esplumosa en botelles de chapa mentanto un gaiteru toca la muiñeira col tambor pegáu al llombu. Y claro, depués quexámonos de los estereotipos.

This work is licensed under a Creative Commons Attribution 4.0 International License.