El trunfu del soberanismu andaluz marca’l camín del soberanismu asturianu

Les elecciones andaluces d’esti 17 de mayu dexaron munches llectures, pero hai una que sobresal con claridá: cuando’l soberanismu ye quien a construyir una propuesta propia, pegada al país y alloñada de les dinámques estatalistes, la sociedá responde. El casu d’Adelante Andalucía ye’l meyor exemplu.

Mientres el PSOE firmó’l peor resultáu de la so historia n’Andalucía y la coalición estatalista de Por Andalucía quedó estancada, Adelante Andalucía protagonizó’l mayor avance de la izquierda andaluza, pasando de dos a ocho escaños y doblando’l so porcentaxe de votu. Nun foi un fenómenu casual nin una simple suma electoral: foi la consecuencia d’una estratexa política clara, basada nun discursu andalucista, soberanista y enfocáu nos problemes propios del país.

La candidatura encabezada por José Ignacio García supo ocupar un espaciu que les fuerces dependientes de Madrid dexaren vacíu. Nun compitieron por ser una sucursal más d’un proyeutu estatal, sinón por construyir una voz andaluza con perfil propiu. Y esi ye precisamente’l principal deprendizaxe que tendría de mirar con atención el soberanismu asturianu.

N’Asturies, demientres años, les distintes sensibilidaes soberanistes y asturianistes quedaron atrapaes ente la división interna y la dependencia de marcos políticos dictaos dende fuera. Con honroses escepciones, llevase décades apostando pola integración en plataformes estatalistes wnantes que pola construcción d’una ferramienta política propia capaz d’interpelar a la mayoría social asturiana. El resultáu foi la irrelevancia institucional y la incapacidá pa convertir l’asturianismu políticu nuna alternativa real de país.

Lo qu’amuesa Andalucía ye qu’hai espaciu pa otra vía. Una vía na que la defensa de la identidá nacional, de la llingua, del territoriu y de los derechos sociales nun tea subordinada a estratexes definíes en Madrid. Una vía onde’l soberanismu seya capaz de falar de vivienda, industria, mocedá, despoblación o servicios públicos dende una óptica asturiana y non como simple ecu de debates estatales.

Tamién hai otra enseñanza importante: la unidá d’aición. Anque les distintes corrientes del andalucismu nun compartan toles posiciones, Adelante Andalucía foi quien a consolidar una referencia reconocible, coherente y estable nel tiempu. Nel casu asturianu, los cancios de serena estatalistes, la fragmentación permanente y les disputes internes acabaron pesando más que’l proyeutu coleutivu. Y ensin una mínima acumulación de fuercies va ser imposible ofrecer una alternativa política viable a la sociedá asturiana.

L’avance d’Adelante Andalucía produzse, amás, nun contestu mui adversu pa la izquierda estatal y con una derecha mui fuerte electoralmente. Precisamente por eso tien más valor. Demuestra que la construcción d’un espaciu soberanista propiu nun depende solo del ciclu ideolóxicu estatal, sinón de la capacidá pa coneutar emocional y políticamente col país real.

Asturies lleva años necesitando una alternativa que combine conciencia nacional, xusticia social y vocación de mayoríes. El modelu de dependencia de proyeutos estatales demostró sobradamente los sos llendes. Andalucía acaba d’amosar qu’hai otru camín posible. La cuestión agora ye si’l soberanismu asturianu va siguir mirando pa Madrid o va decidise, d’una vegada, a mirar pa Asturies.

This work is licensed under a Creative Commons Attribution 4.0 International License.