Allugamientu del proyeutu Bess-Maruca

La Conseyería de Movilidá, Mediu Ambiente y Xestión d’Emerxencies dio lluz verde al parque de bateríes de La Maruca, n’Avilés, ensin atender les alegaciones presentaes pol Colectivu Ecoloxista d’Avilés, que vien denunciando dende hai meses el grave riesgu que supón la ubicación escoyida pa esti proyectu. La resolución favorable espublizóse nel BOPA y torna poner enriba la mesa’l debate sobre l’espoxigue d’esti tipu d’instalaciones industriales ensin una planificación territorial nin criterios preventivos afayaizos

El proyectu Bess Maruca 1 va tar compuestu por ocho contenedores de bateríes, con una potencia d’accesu y conexón de 10,8 MW, y va allugase nuna nave del polígonu de Les Arobies, na esquina ente la cai Marqués de Teverga y la cai El Torno. Pero’l principal problema nun ye namái’l tamañu de la instalación, sinón el llugar escoyíu: parede con parede con una gasolinera.

Dende’l Colectivu Ecoloxista d’Avilés considérase qu’esta decisión ye una irresponsabilidá manifiesta. La proximidá ente un parque de bateríes de ión-litiu y una estación de serviciu multiplica los riesgos en casu d’incendiu o fuga térmica, una situación especialmente peligrosa nuna zona industrial y comercial onde trabayen miles de persones diariamente. Nun radiu de 500 metros hai empreses, naves y actividá continua, polo que cualquier incidente podría tener consecuencies gravísimes.

Nun hai qu’escaecer que les bateríes d’esti tipu presenten un comportamientu especialmente complexu cuando se producen fallos térmicos o incendios. Les sustancies emitíes pueden ser irritantes, corrosives y tóxiques, afectando tanto a la salú humana como al mediu ambiente. La esperiencia internacional demuestra que los fueos nes bateríes de litiu son difíciles d’apagar y qu’en munchos casos nin les escumes nin el CO₂ resulten efectivos, siendo l’agua’l principal mediu d’estinción. Eso supón tamién un problema añadíu: la posible contaminación de grandes volúmenes d’agua emplegaos nes llabores d’apagáu.

Los ecoloxistes recuerden qu’estes instalaciones nun deberíen autorizase cerca de núcleos poblaos nin d’espacios sensibles, precisamente poles consecuencies irreversibles que puede xenerar un accidente grave. Sicasí, la Conseyería optó por aprobar el proyectu ensin introducir cambios nin valorar de manera suficiente les advertencies presentaes.

El casu de La Maruca nun ye aislláu. Na comarca d’Avilés siguen multiplicándose los proyectos de parques de bateríes. Anguañu conócense yá 16 iniciatives: cinco n’Avilés, trés en Corvera y ocho en Gozón. Dalgunos proyectos contemplen namái dos contenedores d’almacenamientu, pero otros lleguen hasta los 72, lo que fai medrar l’esmolecimientu social y ambiental pola falta d’una ordenación clara y d’una evaluación acumulativa de los riesgos.

El Colectivu Ecoloxista d’Avilés considera que la transición enerxética nun puede convertise nuna carrera ensin control onde prime la rapidez sobre la seguridá. La implantación de nueves infracadarmes tien de facese con criterios de prevención, sentíu común y protección efectiva de les persones y del territoriu.