Trece establecimientos participen esta fin de selmana nes XXXVII Xornaes Gastronómiques de los Platos a la Sidra de Nava, una cita yá clásica del calendariu gastronómicu asturianu que torna convertir la capital de la Contorna de la Sidra nun puntu d’alcuentru alredor de la cultura sidrera y la cocina tradicional.

La presentación oficial celebróse nel Muséu de la Sidra d’Asturies, onde representantes de la hostelería, la Confradería de los Siceratores y les instituciones reivindicaron el valor d’unes xornaes que cumplen 37 ediciones y que siguen siendo una de les cites gastronómiques más veteranes del país.

“La felicidá tamién se cocina a la sidre”, destacóse mientres l’actu. La escritora y periodista Ana Paz Paredes, madrina del eventu, punxo en valor la unión ente sidra, productu local y cocina asturiana, recordando que formen parte “del nuesu castiellu o’l nuesu castru”.

Tres dellos años con menor participación, esta edición recupera puxu con trece establecimientos participantes: Casa Mino, Casa Dominganes, Sidrería Estrada, El Corralín de Campanal, Restaurante El Empalme, Bar Penamayor, Sidrería Prida, Poi Pizza, Plaza, La Naveta, Café Mayfer, Cervecería Champion y Bunker Bar.

Demientres trés díes, la sidre va tar presente en carnes, pexes, mariscos y postres, con recetes que van dende les más tradicionales hasta propuestes más innovadores. Nel programa apaecen platos como bacaláu a la sidra, cabritu guisáu con aguardiente de sidra, tortilla con quesu Ovín y cecina a la sidra, pizza Ibérica 2.0 con chorizos a la sidra o picatostes con xeláu de sidra.

Les xornaes tán entamaes por Hostelnava y la Confradería de los Siceratores, y vuelven demostrar la capacidá de la hostelería naveta pa siguir venceyando gastronomía, identidá y cultura sidrera. Dende’l sector volvió reclamase tamién mayor sofitu institucional pa esti tipu d’iniciatives que, amás de dinamizar la economía local, ayuden a caltener viva la cultura sidrera asturiana y la promoción del productu del país.

La reconocencia internacional de la cultura sidrera asturiana contrasta, sicasí, cola falta d’un sofitu más decidíu per parte del Principáu a munches actividaes que lleven décades defendiendo y difundiendo esti patrimoniu cultural dende’l territoriu.

El programa complétase con un pasacais el domingu a les 13.00 hores amenizáu por Los Gascones, poniendo’l toque musical a una fin de selmana onde la sidra vuelve ser protagonista.

This work is licensed under a Creative Commons Attribution 4.0 International License.