Siete neños y neñes del Colexu Públicu de Veguín van quedar el próximu cursu ensin serviciu d’almuerzu depués de que’l Conceyu d’Uviéu denegare la concesión de la ayuda ‘por ser pocos’
Los comedores escolares son imprescindibles pa munches families
Les families de los escolinos sí cumplen los requisitos marcaos nes bases reguladores, pero’l consistoriu xustifica la negativa aludiendo a una cláusula de la convocatoria qu’afita que “la beca nun podrá ser oxetu de disfrute en casu de nun algamase la ratio mínima esixida pa procedese a la prestación d’esti serviciu”, ello ye, qu’al nun algamase’l mínimu de 12 solicitantes afitáu nel contratu del serviciu de comedor escolar nun tienen drechu a ello.
SUATEA denuncia la situación y considera inaceptable que siete menores qu’acrediten les condiciones necesaries queden ensin esti recursu por criterios de rentabilidá de la empresa adxudicataria. Nel casu del colexu de Veguín, con una matrícula d’unos 30 escolinos, les solicitúes representen cerca d’una cuarta parte del alumnáu del centru.
El serviciu d’almuerzu de desayunu ye fundamental pa facilitar la conciliación familiar y llaboral, especialmente nes families onde los horarios de trabayu obliguen a dexar a los menores nel centru antes del entamu de les clases. El sindicatu apunta tamién que son les muyeres les que, de manera habitual, acaben asumiendo les consecuencies d’estes carencies, amenorgando xornaes o abandonando emplegos.
SUATEA criticó amás el modelu d’externalización de servicios básicos como comedores y tresporte escolar, que —afirmen— acaba provocando deficiencies na prestación o incluso la desaparición del serviciu nos centros pequeños o periféricos.
El sindicatu reclamó al alcalde d’Uviéu y a les conceyalíes d’Educación, Salú Pública, Economía y Polítiques Sociales que busquen una solución pa garantizar el serviciu nel CP Veguín y reiteró la so defensa d’un modelu de servicios públicos “transparentes, de calidá y con garantíes pa les persones usuaries y el personal”.
This work is licensed under a Creative Commons Attribution 4.0 International License.
