L’aplicación de les biblioteques públiques, que permite l’empréstamu de llibros electrónicos, audiollibros, revistes y periódicos, cuenta con más de 25.500 archivos disponibles, pero dengún d’ellos ta na n’asturianu

La situación pon de manifiestu una realidá que se repite n’estremaos ámbetos culturales y institucionales: ensin reconocencia oficial, l’asturianu queda fuera de munchos servicios públicos y plataformes estatales, inclusive cuando sí incorporen conteníos n’otres llingües del Estáu. Nel casu d’eBiblio, el Ministeriu de Cultura ye’l principal suministrador de les llicencies disponibles y la mayor parte del catálogu inclúi obres en castellán y nes llingües oficiales.

Esti vacíu supón que les persones usuaries d’Asturies nun puedan acceder en llinia a la producción lliteraria na so llingua, nun serviciu públicu teóricamente pensáu precisamente pa facilitar l’accesu universal a la cultura. La contradicción ye más evidente si se tien en cuenta que la lliteratura n’asturianu cuenta con décades de producción continua, editoriales especializaes y decenes d’autores y obres espublizaes.

La falta d’oficialidá provoca que munches plataformes estatales nun contemplen automáticamente l’asturianu dientro de les sos opciones llingüístiques, dexando la so presencia a la voluntá política puntual o a alcuerdos específicos. El resultáu ye que la llingua queda d’avezu relegada o directamente invisibilizada nos nuevos espacios dixitales, que cada vegada tienen más importancia nel espardimientu cultural.

Comu ficieron notar dende Iniciativa pol Asturianu, esta situación tien consecuencies práutiques pa escritores, editoriales, llectores y colectivos culturales, que ven llindaes les posibilidaes de distribución y visibilidá de les sos obres. Tamién afecta a la diáspora asturiana y a los Centros Asturianos, que podríen utilizar estes ferramientes como vía d’accesu a la cultura del país.

eBiblio vuelve poner sobre la mesa que, mientres l’asturianu nun tenga un marcu d’oficialidá que garantice derechos y presencia institucional estable, van siguir repitiéndose situaciones d’esclusión nos servicios públicos culturales y dixitales.