Onde trunfa’l soberanismu, la ultraderecha recula
Les postreres eleiciones llocales y nacionales cellebraes en Gran Bretaña confirmaron l’ascensu de la ultraderecha inglesa de Reform UK, la formación lliderada por Nigel Farage, pero tamién dexaron un datu políticu bien significativu: l’independentismu escocés y galés convirtióse nel principal frenu frente al xorrecimientu reaccionariu qu’avanza n’Inglaterra.
Mientres Reform UK consiguió importantes avances en numberoses zones ingleses afectaes pola cris económica y pol descontentu social, n’Escocia y Gales la realidá electoral foi distinta. Ellí, les fuerces soberanistes y les opciones más venceyaes a discursos sociales y europeístes consiguieron contener con muncha más eficacia’l xorrecimientu de la estrema derecha.
N’Escocia, el Partíu Nacional Escocés (SNP) tornó demostrar la so fortaleza electoral y caltuvo una posición central nel sistema políticu escocés. Los nacionalistes destacaron que los resultaos evidencien dos modelos políticos ca vegada más enfrentaos dientro del Reinu Xuníu: ún marcáu pol nacionalismu británicu, el populismu y les polítiques antiinmigración; y otru más abiertu, social y europeísta.
En Gales, anque’l Partíu Llaborista sufrió un importante retrocesu, les fuerces nacionalistes y progresistes consiguieron tamién llindar l’impautu de la ultraderecha. Distintos analistes señalen que la esistencia d’una conciencia nacional fuerte y d’un debate políticu propiu tán funcionando como una barrera frente a los discursos más reaccionarios.
Los comicios dexen ver con claridá cómo’l mapa políticu británicu ta ca vevegada más fracturáu. Inglaterra inclínase darréu escontra posiciones conservadores y populistes, mentes que les naciones con movimientos soberanistes fuertes presenten una mayor resistencia a esi procesu.
Dende sectores independentistes escoceses y galeses considérase qu’estos resultaos refuercen la idega de que la defensa de la soberanía nacional, de los servicios públicos y d’una visión más plural de la sociedá constitúi güei una de les principales muries frente al avance de la ultraderecha en Gran Bretaña.
This work is licensed under a Creative Commons Attribution 4.0 International License.
