El pueblu asturianu tornó falar alto y claro esti sábadu na tradicional Mani de les Lletres, reclamando los sos drechos llingüísticos, respetu y dignidá.
Cabecera del manifestamientu
Qu’un manifestamientu que reclama un drechu seya yá “tradicional” —y nun pue llamase d’otra manera cuando va camín del mediu sieglu— diz muncho. Fala de fasta qué puntu la clas dirixente siguió ignorando la voz del pueblu y les sos revindicaciones. Cuenta cómo’l pueblu asturianu ta dispuestu a siguir reclamando lo que ye de so, a siguir falando, glayando, escribiendo y esixendo oficialidá ensin dase.
Porque lo que se reclama nun ye un privilexu nin una concesión simbólica. Reclámase daqué tan básico como poder vivir na propia llingua con normalidá, ensin discriminaciones nin torgues alministratives. Reclámase’l drechu a estudiar, trabayar, dirixise a les instituciones o ser atendíos n’asturianu ensin qu’eso suponga un problema. Reclámase dignidá.
Ayeri foron miles los que se manifestaron —nos manifestemos— peles cais d’Uviéu reclamando la oficialidá. Más de cuatro mil persones que nun se dan —nun mos damos—. Una marcha na que s’amestaron xeneraciones, xente mozo, families, militantes hestóricos de la revindicación llingüística, persones que nun acudieren nunca primero, pero que sienten cada vegada más evidente la necesidá de defender lo que ye propio y fasta presencies sosprendentes de persones y grupos que tuvieron y tienen nes sos manes camudar les coses.
Pero nesta brenga nun somos namás los que salimos a la cai. Somos los cientos de miles que caltenemos viva esta llingua nel día ente día; los que la falamos, con arguyu unos y con una cierta vergoña impuesta por décades de represión otros. Los que la enseñen a los sos fíos, los que la deprenden de mou natural, los que vienen de lloñe y saben entender y respetar el país que los acueye y tamién la deprenden. Los que la escribimos, los que la lleemos, los que la usamos nes redes, na escuela, nel trabayu, nos chigres y nes cases.
Porque l’asturianu sobrevive gracies al pueblu, ensin oficialidá, ensin sofitu institucional y contra la propia presión política que buscaba arrincalu de nos. Y, sicasí, equí sigue. Vivo. Falao. Tresmitio. Reclamando’l llugar que-y correspuende, reclamando la oficialidá.
Pero nun escaezamos, la oficialidá nun ye’l final de nada; ye namás el mínimu democráticu qu’otros pueblos del Estáu tienen reconocíu dende hai años. Ye poner fin a una anomalía histórica y asumir que l’asturianu forma parte del patrimoniu cultural y humanu d’esti país. D’ehí, habrá que tirar p’alantre.
Somos munchos, munchísimos, los que tamos dispuestos a nun dexar qu’esta llingua muerra, porque sabemos que ye una parte fundamental de la nuesa identidá como asturianos y porque nun queremos dexar de ser quien somos. Porque ye xusto, porque ye de llei, porque tenemos drechu: oficialidá, plena, darréu.
This work is licensed under a Creative Commons Attribution 4.0 International License.
