Decenes de persones tornaron a concentrase ayeri xuntu al edificiu de la Gota Llechi, en Xixón, siguiendo la convocatoria mensual que la Plataforma Stop Violencies entama cada últimu miércoles de mes pa visibilizar el doliosu contador de muyeres asesinaes y reiterar la refuga social ante los crímenes machistes.

Nel trescursu de la concentración lleéronse con solemnidá los nomes de toles víctimes mortales no que va d’añu, que yá sumen 32. Trátase d’un xestu pensáu pa evitar l’anonimatu y pa recordar que cada asesinatu machista supón una vida truncada y un círculu familiar estremáu.

L’actu cuntó col respaldu de diversos coleutivos feministes, sindicales y sociales, ente ellos Andecha Astur, Anticapitalistes, Amamantar, l’Asociación de Pensionistes de Xixón, l’Asociación Ecofeminista Petra Kelly d’Asturies, el Colectivu de Trabayadores, Feminismu en Llucha del CSI, la plataforma del Serviciu d’Ayuda a Domiciliu (SAD), Podemos y Verdes–Equo.

Na intervención central, a cargu d’una representante de la CSI, destacóse la importancia de nomar la violencia machista como primer pasu pa combatila. La portavoz punxo l’accentu na necesidá de visibilizar cada vida perdida, más allá de les cifres, y denunció que munches agresiones siguen produciéndose en silenciu. Amás, señaló que cada asesinatu nun ye un fechu aislláu, sinón el reflexu d’un sistema que falla na protección de les muyeres, inclusive en casos onde’l riesgu yera conocíu.

Dende una perspectiva sindical, la intervención tamién incidió en que la violencia machista tien raíces y consecuencies nel ámbitu llaboral, venceyada a la precariedá, la dependencia económica y la discriminación. Nesti sentíu vindicóse la necesidá d’afitar la llucha contra esta violencia de la man de la defensa de los drechos llaborales y de la construcción d’entornos de trabayu seguros y dignos.

Les persones asistentes volvieron asina reclamar una implicación activa de tola sociedá pa erradicar una violencia que calificaron d’estructural, reafirmando’l so compromisu de siguir saliendo a la cai cada mes pa recordar a les víctimes y esixir soluciones efectives.