La negativa del diariu La Nueva España a incluyir una flor del agua nuna esquela xeneró indignación nuna familia asturiana, que considera la decisión un posible casu de discriminación cultural y relixosa.

Según esplicaron les persones afeutaes, la familia solicitó que la esquela fuere acompañada d’esti símbolu tradicional asturianu, conocíu pola so presencia na cultura popular y nos elementos decorativos venceyaos a la tradición del país. Sicasí, dende’l mediu comunicóse-yos que namás s’acepten imáxenes de conteníu cristianu pa esti tipu de servicios funerarios.

La decisión provocó indignación ente los allegaos, que consideren que tán imponiéndose criterios escluyentes nun espaciu públicu y comercial nel que tendría de garantizase la pluralidá de sensibilidaes y creyencies.

La familia valora agora emprender acciones llegales o presentar una denuncia formal pol casu, al entender que podría tratase d’una vulneración de la llibertá de credu, si se permite l’usu d’iconografía relixosa determinada y se veta otra simbología de calter espiritual o identitariu.

Amás, señalaron que van siguir atentos a les próximes esqueles publicaes pol mediu pa comprobar si se permiten otros símbolos o imáxenes estremaes de les cristianes. D’esa comprobación, indiquen, dependerá valorar si tán ante un casu de discriminación ideolóxica y relixosa xenérica o  si se trata d’un episodiu más d’asturfobia, ello ye, de despreciu escontra la cultura asturiana.

Hasta’l momentu, La Nueva España nun fixo pública denguna esplicación adicional sobre los criterios aplicaos nes esqueles nin sobre esti casu concretu.