La rellación ente la llingua asturiana y la cultura de la sidra sigue siendo una de les espresiones más visibles del patrimoniu cultural del país. Dende los llagares hasta los chigres, pasando poles fiestes populares o los concursos d’escanciadores, el vocabulariu sidreru caltién una fuerte presencia social.

Pallabres como culín, espicha, pumarada, mayar, llagar o echar sidra formen parte del usu cotidianu y tresmitiéronse de xeneración en xeneración venceyaes a la vida social asturiana.

La Fundación Asturies XXI recuerda na so nueva espublización que protexer la cultura sidrera implica tamién defender la terminoloxía tradicional y la tresmisión oral que la acompañó históricamente. La espublización cunta col sofitu de la Conseyería de Cultura, Política Llingüística y Deporte.

Especialistes en patrimoniu consideran que la sidra ye ún de los espacios onde la llingua asturiana siguió viva con más naturalidá, convirtiéndose nuna ferramienta fundamental pa conectar la tradición col presente y col futuru.

This work is licensed under a Creative Commons Attribution 4.0 International License.