Del Facebook de Daniel García de la Cuesta
“Igual algún día tendremos responsables culturales y políticos que sepan algo d’Asturies y miren poles coses de casa con ciñu y procuru pa dexar algo pa los que vienen detrás, pero pa eso, hai que ponelos nos cargos públicos y,.. pel camín que vamos… pues tenemos esto…”
Sobre Convivium en Xixón. Despropositum desafortunadum, unu más pa facer que la hestoria de la villa seya munchu mui romanum, aprovechandum que’l Mediterraneum pasa pel Cantabricum.
Convivium ye un vocablu llatinu que significa xuntanza, banquete, llacuada, atropamientu pa comer y beber. Pa xuntase a beber tamién hai un vocablu Griegu symposion, d’onde sal lo d’aconceyase pa tratar sobre algún tema.
Ello ye que, n’abril del 2024, nel Museo Arqueológico Nacional de Madrid, inauguróse la muestra entitulada Arqueología de la dieta mediterránea, organizada por varies entidades y patrocinadores con unos motivos concretos, afalagar lo que se conoz como dieta mediterrania, un conceutu modernu nel que se barrunta que’l tipu de consumu de productos de la cuenca mediterrania pa comer y beber pue ser más saludable qu’otros. Nel enllaz vien más info.
Como puede vese nesti otru enllaz a la visita virtual nel MAN, lo que se mostraba yera un amestu de temátiques hestóriques venceyaes a les cultures mediterranies nes que los mundos griegos, romanos o árabes, tuvieren presencia nun procesu de miles d’años según los materiales qu’apaecen en diferentes llugares, y que formen parte del conocimientu de lo que se comía, lo que se bebía y tolo qu’arrodia al fechu de poner los productos nun platu o nuna cacipla, la pesca, la caza, los preseos de trabayar la tierra, rituales alredor d’ello, etc…, y cómo fueron desendolcándose al traviés del tiempu. Dalgo siempre mui interesante y too acompangao de charres y actividaes alredor d’esta temática.
Como otres esposiciones, esta podía ser portátil, y, curiosamente, entre tolos posibles llugares onde podría llevase, mira qu’hai sitios nel mediterraniu, paez que nun-y interesó a dengún, y la única muestra fuera de Madrid, qu’haya visto, inauguróse nun llugar mui mediterraniu, en Xixón, nel palaciu Revillagigedo, el 30 de marzu de 2026, y va tar hasta’l 12 de xunetu.
Val, como ya taba fecha, pues “namás” yera traela p’Asturies y ya, peeero, a dalguién se-y ocurrió, o pensó, que la muestra igual cuadraba meyor si tenía que ver con Asturies y el conceutu de “Gijón Romano”, idea propagandística y turística que tánto-y gusta vender y patrocinar a los responsables hestórico culturales del conceyu y de l’Alministración cultural.
Pa ello, creóse una especie de muestra Frankestein onde s’adultera y se mecigaya’l conceutu cultural pol que fue creada la esposición, el mediterraniu, cola hestoria del territoriu hestóricu asturianu cantábricu, el medievu, l’actualidá, etc. Ente los obxetos que se ven, lo mesmo hai coses etnográfiques d’Asturies, dalgunes que nun esistieron nel mediterraniu, qu’una plaquina de fayenza exipcia con una vaca, un platu de terra sigilata, un mesa d’ofrendes exipcia, un capitel románicu de Cartagena, unes costielles de ballenes del sieglu 16 de Gozón, un baldre marineru de Xixón de 1940, pieces de vidriu feches na fábrica La Industria de Xixón nel sieglu 20, qu’una cratera griega de fai 2500 años con una escena de banquete y música con una kelys lyra, quiciás un Apolo, y unos auloi, quiciás una Euterpe. Un revueltu del qu’ún pue salir pensando qu’igual, a lo meyor, la xente que vivió n’Asturies nos últimos miles d’años taben nel mediterraniu y nun lo sabíen.
El títulu orixinal de la muestra ye bien claru, Arqueología de la dieta mediterránea, y ya vien impuestu por ser una cosa fecha, hasta cola mesma imaxen na propaganda que la usada en Madrid, pero como puede vese, el conceutu nun cuaya equí, o nun s’entiende, y la mesma prensa recueye dalgo mui distinto, como se ve nesti titular de LNE del pasáu 30 de marzu:
“Gijón viaja al pasado con “Convivium”, un homenaje a la dieta cantábrica con más de 300 piezas arqueológicas: “Es una exposición única”
A ver, ¿hai una dieta cantábrica?, ¿en qué quedamos?, ¿De qué va la muestra? ¿ye lo mesmo una cosa que la otra?
Pa embarullalo más, ente la programación pueden topase actividaes sobre “sidras atlánticas”, si, ya sabéis que la palabra celta da-yos perceguera. Otra actividá va de: “Pan y vino. En esta cata de vinos atlánticos, los asistentes descubrirán las particularidades de los vinos influenciados por el clima fresco y húmedo de las zonas costeras del Atlántico. Se acompañarán con pinchos realizados con pan de escanda y pan de maíz”
El vino, hestóricamente, escaseaba tantu ente los ástures que diben de rapiña a por ello a la meseta, y claro, la escanda y el maízu tienen de ser mui mediterranios tamién.
Una cosa que se-yos pasó na muestra, o nun conocen, ye la fame que, hestóricamente, quitó la berza, vexetal que formó parte importante de la dieta de munchos llugares de los que se denominen celtes, “atlánticos”, d’onde ye orixinariu. Otra actividá va de: “Cervezas atlánticas” y otra de “Cata de aceite”, esi aceite que tantos olivos daben n’Asturies.
La muestra de música, tamién vien cola esposición, a cargu de los bonos músicos del grupu Artefactum embaxo’l títulu, “In vino veritas”, con un repertoriu medieval basáu nes cantigues a Santa María y cantares onde’l vino tenga algo que ver. Mui mediterranio o cantábrico tamién. Otra actividá llámame munchu l’atención, porque, embaxo’l titulu “¿Qué hay para comer? la alimentación a través de la arqueología”, organízase pal Foro de las mujeres d’El LLano, igual queda un poco machistorro. Otra actividá va pa los llambiones: “Taller de elaboración y degustación de dulces en la dieta mediterránea: origen y evolución”, y al final acaba amestándose la idea a la participación de diferentes pasteleríes que tán no que se denomina “Gijon Goloso”.
Nun sé, pienso que si a los responsables que traen la esposición a Xixón gustó-yos el conceutu de la muestra madrilana, igual podíen pensar en facer una muestra colo de casa, y asina conocer meyor lo que tenemos cerca ensin embarullar conceutos, obxetos, hestoria, gastronomía, música, etc. Didáuticamente paezme penoso.
Igual algún día tendremos responsables culturales y políticos que sepan algo d’Asturies y miren poles coses de casa con ciñu y procuru pa dexar algo pa los que vienen detrás, pero pa eso, hai que ponelos nos cargos públicos y,.. pel camín que vamos… pues tenemos esto……
This work is licensed under a Creative Commons Attribution 4.0 International License.
