La radiotelevisión pública asturiana enfréntase a un momentu decisivu nel que resulta imprescindible un cambéu de llinia que garantice una presencia real y digna de la llingua asturiana.

Tres el cese de Francisco González Orejas al frente del ente, ábrese una oportunidá pa redefinir el papel de la RTPA como ferramienta clave na normalización social del asturianu.

Na actualidá, la presencia del idioma na programación ye nidiamente insuficiente y queda llindada a espacios testimoniales, mui alloñaos de lo que correspondería a un mediu públicu que tien ente los sos oxetivos la promoción del patrimoniu cultural y llingüísticu. Esta situación nun solo contrasta cola realidá d’otres comunidaes con llingua propia, sinón que tamién entra en contradicción colos compromisos institucionales asumíos, como la Carta Europea de les Llingües Rexonales o Minoritaries o la propia Llei d’Usu.

El momentu actual vien marcáu, amás, pola posibilidá de que’l futuru contratu-programa ente’l Gobiernu y la RTPA fixe porcentaxes concretes de programación nes llingües propies. Esta ferramienta, anque inda ensin desarrollar dafechu, abre la puerta a pasar d’una presencia simbólica a una planificación real y evaluable, lo que podría suponer un puntu d’inflexón na historia del ente públicu.

Pa que esti cambéu seya posible, resulta fundamental que la nueva dirección de la RTPA asuma un compromisu claru col idioma y tea dispuesta a defendelo nel terrén de la negociación política y presupuestaria. Nun se trata namás d’ampliar minutos, sinón de garantizar una presencia transversal  en tolos xéneros y franxes horaries, dende los informativos hasta l’entretenimientu, la cultura o la programación infantil.

Dende dellos ámbitos culturales, como Iniciativa pol Asturianu, vien reclamándose esti cambéu de rumbu, insistiendo na necesidá de que la dirección del ente tea encabezada por perfiles comprometíos cola normalización llingüística. Sicasí, más allá de les demandes concretes d’esta o d’otres organizaciones, la cuestión de fondu afecta al modelu de mediu públicu que se quier pa Asturies.

La responsabilidá recai agora nos partíos con representación parlamentaria, que tienen la oportunidá —y la obligación— de consensuar una candidatura que nun sía ayena a la realidá llingüística del país. La decisión que se tome nun solo determinará la orientación de la RTPA nos próximos años, sinón que tamién marcará’l papel que la llingua va ocupar nel espaciu públicu.

Dende Iniciativa pol Asturianu recalquen que, nun contestu nel que la oficialidá del asturianu vien ganando apoyos institucionales y sociales, resultaría incoherente caltener un modelu de radiotelevisión que siga relegando’l idioma a una posición marxinal. La RTPA tien la capacidá —y la responsabilidá— de convertise nun pegoyu fundamental pa la normalización llingüística, pero pa ello ye imprescindible un cambéu decidíu na so orientación estratéxica.

This work is licensed under a Creative Commons Attribution 4.0 International License.