Taller d’echar sidre

La Primer Sidre l’Añu preslló esta fin de selmana con una nueva edición marcada pola alta participación y el bon ambiente, confirmándose como una de les grandes cites del calendariu cultural asturianu.

Les cifres caltuviéronse respeuto al añu pasáu, con alredor de 10.000 asistentes, nuna edición na que la sidre corrió ensin parar —con reposición de dellos llagares— y les tasties y degustaciones colgaron el cartel de completu.

L’ambiente foi de folixa continua, con música, baille, xuegos tradicionales y una fuerte presencia familiar. Los más pequeños tuvieron especial protagonismu, participando na mayada y averándose a la cultura sidrera dende la esperiencia.

Nos concursos, Nerea Valledor foi reconocida como meyor escanciadora amateur, ente que Marcos Rodríguez, de Salas, llevó’l premiu a la meyor sidre casero fecha en madera.

La organización, a cargu de la Fundación Asturies XXI, amuésase satisfecha tres cuatro díes nos que la sidre volvió ser la gran protagonista. Dende la organización destaquen tamién el creciente interés del públicu, con asistentes cada vez más formaos que participen nes tasties guíaes y comparten impresiones sobre les sidres. Nes redes sociales, l’eventu volvió tener gran repercusión, con numberoses imáxenes y vídeos compartíos polos asistentes que dan cuenta del ambiente vivíu nel recintu.

La Primer Sidre l’Añu vuelve asina presllar con ésitu, medrando en participación y proyección, y reafitándose como una celebración clave pa vivir la cultura asturiana de la sidre.

This work is licensed under a Creative Commons Attribution 4.0 International License.